Lífið

Vorspá Siggu Kling – Hrúturinn: Óbilandi kraftur í stjörnukortinu þínu

Sigga Kling skrifar

Elsku Hrúturinn minn, þú ert í svo skemmtilegri rússíbanahringekju og hver dagur virðist koma með ný skilaboð, þú getur með sanni sagt að það sé búið að vera aldeilis mikið að frétta í kringum þig.  Það er óbilandi kraftur í stjörnukortinu þínu og það sem virtist ómögulegt eða ekki hægt fyrir stundu, þá færðu núna upp í hendurnar óvenjulega og nýja möguleika.

Peningar reddast, jafnvel alveg á síðustu stundu, en hvað með það ef þeir redduðust? Þar sem þú ert partur af alheiminum, þá eru skilaboðin sem þú sendir frá þér mikilvæg og þegar þú hugsar í 68 sekúndur um eitthvað sem þú þráir frá hjartans rótum þá ertu búinn að festa þá orku inni í líflínunni þinni. Það er svo magnað hvað þú getur sett út og auðveldlega fengið, en samt kemur það oft fyrir að þú bara nennir því ekki, elsku Hrúturinn minn.

Allar hraðahindranir núna eru góðar því þær hrista upp ný tækifæri, það verða þrumur, eldingar og rigning og svo REGNBOGI. Þú skalt tímasetja markmiðin þín, því annars eru þau bara óskir og styttu tímann um helming frá því sem þú áætlar þínum markmiðum og vittu til það mun virka.

Ég segi að eftir gott dagsverk líður mér svo vel og maímánuður gefur þér svo mörg góð dagsverk, settu meiri gleði í verkefni þín, bæði lítil og stór og líka í ástina því hún er stærsta verkefnið.

Þú nærð öllu á seiglunni, ótrúlegustu veikindi minnka eða hverfa á þessu tímabili og mikil hreyfing verður á  Hrútnum núna og þú munt koma sjálfum þér á óvart, munt jafnvel klífa fjöll og firnindi.

Þú átt eftir að njóta þess í botn að sjá árangur og átt eftir að skapa, vinna og framkvæma miklu meira en meðalmaðurinn, það eina sem getur pirrað þig elskan mín er annarra manna svartsýni, neikvæðni og bölmóður. Það er svo sannarlega hægt að segja þú sért trygg manneskja, en einn af þínum góðu hæfileikum er daður og það er alveg sama hvar ég er þá sé ég þig fyrst af öllum.

Knús og kossar, Sigga Kling.

Hrútur 22. mars - 19. apríl

Hera Björk Þórhallsdóttir söngkona, 29. mars
Björgvin Halldórsson söngvari, 16. apríl
Kári Stefánsson vísindamaður, 6. apríl
Vigdís Finnbogadóttir, fyrrverandi forseti, 15. apríl
Anna Svava Knútsdóttir leikkona, 31. mars
Elton John söngvari, 25. mars
Salka Sól , 18. apríl
Berglind Pétursdóttir festival, 2. apríl
Bríet Ísis, tónlistarkona, 22. mars
Lady Gaga, söng- og leikkona, 28. mars
Aretha Franklin, söngkona, 25. mars
Victoria Beckham, kryddpía, 17. apríl
Leonardo da Vinci, listamaður, 15. apríl



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.