Aprílspá Siggu Kling – Steingeitin: Haltu þér á beinu brautinni í sjálfstraustinu

Elsku Steingeitin mín, þú ert ýmist allt eða ekkert, enginn millivegur, gefur þig að fullu og öllu að því sem þú þráir og hlustar þar af leiðandi ekki alveg nógu vel á annarra manna ráðleggingar og tillögur, Steingeitin gerir það sem Steingeitin vill.

Það er ekki meðfætt hlutverk þitt elskan mín að dæma aðra því þú ert forystusauður eða geit og fyrirmynd svo margra annarra, svo sparaðu stóryrðin og einbeittu þér að sveigjanleika því þá fyrst lifirðu lífinu lifandi.

Þú sinnir störfum þínum vel og ert þar með frábær starfsmaður og seinna á lífsleiðinni muntu reka fyrirtæki og gera það vel. Þú ert svo sannarlega stormur af jákvæðni og breytir ótrúlega leiðinlegum veislum í gleðipartý, því þú ert hinn fullkomni veislustjóri sem enginn fagnaður ætti að vera án. Haltu þér á beinu brautinni í sjálfstraustinu, því það er að skapa þér sterka framtíð, þú getur ekki breytt öðrum, heldur bara gert þitt besta til að ná árangri, hvað sem það nú þýðir fyrir þig.

Þú ert heillandi og ástríðufullur og hefur mikil áhrif á þá sem þú elskar og þú lætur ekki reglur samfélagsins segja þér neitt um ástina og harðneitar að láta stjórna þér í þeim efnum. Sýndu þeim sem þú elskar meiri blíðu þá missa ástarörvarnar ekki marks.

Þú ert bæði ábyrgur og traustur en með ríkulegt ímyndunarafl, en þú ert búin að vera á miklum hraða undanfarið og það er aðeins farið að hægjast um, en möguleikarnir eru endalausir svo hafðu opinn huga því þá muntu uppskera ríkulega. Vertu vitur og sýndu öðrum vægð, úr því skapast töfrar og þá sérðu sjálf hvað þú ert mikil hetja og ekkert mun stoppa þig.

Knús og kossar, þín Sigga Kling

Frægar Steingeitur: Guðjón Pétur Lýðsson markakóngur, Svava Johansen í Sautján, Ingibjörg Sólrún Gísladóttir, dr. Kristín Ólafsdóttir og Davíð Oddsson, Jón Gnarr, Elvis Presley, Gunnar Þórðarson, Tómas Guðbjartsson læknahetja, Lovísa Tómas, Dorrit Moussaieff forsetafrú, Þuríður Blær Jóhannsdóttir, leikkona og Reykjavíkurdóttir, Jesús og Simmi á Fabrikkunni, Óttar Proppé, Ingveldur Ægissdóttir módir og kvunndagshetja, Hendrika Waage hönnuður, Laddi, Jóhann K. Jóhannsson fréttamaður.