Guardiola: Gott gengi Leicester kemur ekki á óvart

Pep Guardiola segir frábært gengi Leicester á tímabilinu í ensku úrvalsdeildinni ekki koma á óvart.

Manchester City tekur á móti Leicester á Etihadvellinum síðdegis í dag. Leicester er í öðru sæti deildarinnar með 39 stig, City er sæti á eftir með 35 stig.

„Eftir leikinn við þá á síðasta tímabili þá fannst mér að þeir myndu vera í baráttunni um efstu fjögur sætin á þessu tímabili,“ sagði Guardiola.

„Þeir hafa verið mjög stöðugir á þessu tímabili og eru frábært lið.“

Leicester er með bestu markatölu allra liða í deildinni, hafa unnið fleiri leiki en City og tapað helmingi færri.

„Þeir eru með mikin gæði fram á við og á miðsvæðinu. Þeir eru þéttir varnarlega og góðir í skyndisóknum. Þeir stjórna öllum sviðum leiksins.“

City má ekki við því að missa af stigum í baráttunni við Liverpool á toppnum, en Liverpool er með tíu stiga forskot á Leicester.