Von á skýrslu Ríkisendurskoðunar um heilbrigðismál fanga í lok mánaðarins

Ríkisendurskoðun skilar skýrslu til Alþingis í lok mánaðarins um heilbrigðisþjónustu fanga en stofnunin ákvað í haust að hefja aðalúttekt um þjónustuna.

Eins og Fréttablaðið greindi frá í gær, hefur Ríkisendurskoðun ítrekað gert athugasemdir við geðheilbrigðisþjónustu í fangelsum landsins; fyrst árið 2010 í skýrslu um skipulag og úrræði í fangelsismálum þar sem þeim tilmælum var beint til velferðarráðuneytis að meta þyrfti og mæta þörfum fanga með geðræn vandamál og að móta þyrfti heildarstefnu í málefnum geðsjúkra, fatlaðra og aldraðra dómþola. Tilmælin voru ítrekuð í eftirfylgniskýrslu árið 2013 og aftur 2016.

Í kjölfarið kvaðst velferðarráðuneytið þá hafa unnið að úrbótum en Ríkisendurskoðun taldi árang­ur lítinn og því rétt að fylgja málinu eftir og hefja forkönnun á heilbrigðisþjónustu fanga.

Samkvæmt upplýsingum á vef Ríkisendurskoðunar bentu niðurstöður til að fangar nytu viðunandi almennrar heilbrigðisþjónustu en úrbóta væri þörf vegna geð­heil­brigðis­þjónustu og áfengis- og vímuefnameðferðar. Þá væri stefnumörkun enn ábótavant. Því var ákveðið að hefja aðalúttekt á heilbrigðisþjónustu fanga.

Markmið úttektarinnar er að svara því „hvernig stjórnvöld sjá til þess að fangar fái þá heilbrigðisþjónustu sem þeim ber, hvort skipulag heilbrigðisþjónustu fanga tryggi að henni sé sinnt á hagkvæman og skilvirkan hátt og hvort sú þjónusta skili viðunandi árangri.“