Sami verktaki gleymdi fötluðu stúlkunni 2015

Bílstjóri sem gleymdi mikið fatlaðri konu í bíl ferðaþjónustu fatlaðra á þriðjudag vinnur fyrir sama fyrirtæki og gleymdi 18 ára stúlku í sjö klukkustundir 2015. Þetta staðfestir framkvæmdastjóri Strætó bs. sem telur þó að líklega sé aðeins tilviljun að svo hafi hitt á. Eina skýringin sem fundist hafi á atvikinu í vikunni sé einbeitingarleysi bílstjóra.

Jóhannes Svavar Rúnarsson, framkvæmdastjóri Strætó bs., segir að farið hafi verið yfir málið strax þegar það kom upp. Svo virðist sem allt hafi farið úrskeiðis, ekki hafi verið farið eftir leiðbeiningum og verklagsreglum svo brýna þurfi fyrir verktökum sem sinna Ferðaþjónustu fatlaðra fyrir Strætó bs. að fræða starfsmenn sína.

„Það er ekki hægt að segja að leiðbeiningarnar séu óskýrar eða tækin og tólin ófullnægjandi. Það er óskiljanlegt hvernig svona getur gerst enda erum við með tæki þar sem fólk er stimplað inn og út úr bílnum, bílarnir eru litlir þannig að yfirsýn yfir bílinn ætti að vera auðveld. Þetta er óskiljanlegt atvik og svo sem engin ein skýring. Við finnum ekki aðra skýringu en að þarna hafi ákveðið einbeitingarleysi átt sér stað.

Aðspurður hvort viðkomandi bílstjóri hafi verið sendur í leyfi vegna málsins segir Jóhannes að fyrirtækið tjái sig ekki um slíkt.

Fyrirtækið sem um ræðir heitir All Iceland Tours, einn 20 verktaka sem sinnir akstri fatlaðra fyrir Strætó. Aðspurður hvort tilefni sé til að endurskoða þjónustu þess fyrirtækis, í ljósi þess að þetta er í annað skipti sem fötluð kona gleymist í bílum þess, segir Jóhannes að leiðbeiningar hafi verið ítrekaðar við alla verktaka og mælst til þess að þeir fari ítarlega yfir þær, verklagsreglur og viðbragðsáætlun áður en þeir sendi menn af stað í keyrslu.

„Það er það sem við gerðum gagnvart öllum í þessu ferli. En það er líklega bara tilviljun að þetta kemur svona upp.“

Jóhannes kveðst ekki hafa heyrt af mikilli starfsmannaveltu hjá fyrirtækjunum sem sinna akstrinum, í það minnsta ekki óeðlilegar tölur. Vissulega hafi menn haldist illa í þessu starfi eftir byrjunarörðugleikana 2015, álagið hafi verið mikið og öll mistök ratað í fjölmiðla sem ekki allir hafi höndlað.

„Okkur sýnist við vera með nokkuð reyndan hóp í þessum akstri. Flestir þessara verktaka hafa sinnt þessu í áratugi, það er mikil reynsla og gamalreyndir starfsmenn, en auðvitað einhverjir nýir.“