Fullvissaði Gylfa um að hann væri ennþá vítaskytta liðsins þrátt fyrir klúðrin

Gylfi Þór Sigurðsson er ennþá vítaskytta Everton þrátt fyrir að hafa klúðrað tveimur vítaspyrnum á tímabilinu. Knattspyrnustjóri Everton hefur fulla trú á vítaspyrnutækni íslenska landsliðsmannsins.

Gylfi skoraði af miklu öryggi úr vítaspyrnu á móti Burnley á öðrum degi jóla og eftir leik sagði Gylfi blaðamanni Liverpool Echo frá samtali sínu við knattspyrnustjórann Marco Silva.

Gylfi hafði klúðrað vítaspyrnum á móti bæði Watford og Fulham fyrr á þessu tímabili. Einhverjir bjuggust jafnvel við því að íslenski landsliðsmaðurinn fengi ekki að taka fleiri víti fyrir Everton í vetur. Annað kom á daginn.

Why Gylfi Sigurdsson was never off Everton penalty-taking dutieshttps://t.co/wwbCZGlhnm

— Everton FC News (@LivEchoEFC) December 27, 2018

„Stjórinn talaði við mig og sagði mér hann hefði ennþá fulla trú á mér,“ sagði Gylfi við Liverpool Echo. 

„Fyrir Man. City leikinn og eftir vítaklúðrið á móti Watford þá lét hann mig vita af því að ég tæki næstu vítaspyrnu. Ég hélt því áfram að æfa vítin á æfingum og blessunarlega fór þessi í markið,“ sagði Gylfi.

„Þú ert alltaf vonsvikinn þegar þú klúðrar vítaspyrnum en ég lít svo á að þetta fylgi starfinu. Þú átt eftir að skora úr vítum en einhverjar fara líka forgörðum,“ sagði Gylfi. 

„Maður verður bara að passa það að vinna í þeim og vera tilbúinn ef stjórinn vill að þú takir ábyrgðina á því að skila vítaspyrnu í markið,“ sagði Gylfi.