„Erum að úthluta meira en elstu menn muna“

„Reykjavík var að úthluta metfjölda lóða í fyrra eða 1711,“ segir Dagur B Eggertsson, borgarstjóri Reykjavíkur. „En á fyrri hluta þessa árs verðum við með um 1200 íbúðir til viðbótar þannig að við erum að úthluta meira en elstu menn muna.“

Reykjavíkurborg stóð fyrir kynningarfundi í Ráðhúsinu í morgun þar sem borgarstjóri kynnti lóðaúthlutanir og byggingaráform borgarinnar.

Hafin var smíði á 923 íbúðum í fyrra og 482 voru fullgerðar eða teknar í notkun sama ár. Á árunum 2014 til 2018 var þá hafin uppbygging á 3568 íbúðum.

Í ár gera framkvæmdaraðilar ráð fyrir því að geta afhent 768 íbúðir og enn fleiri árið 2019.

Afending íbúða á næstu árum í Reykjavík
Infogram

Dagur segir að fjölmörg svæði á borgarlandinu séu að opna og unnið sé í því að útdeila lóðum á þeim svæðum sem fólk sér fyrir sér að búa á.

„Við erum að úthluta lóðum á eftirsóttum svæðum eins og í Fossvoginum við Sléttuveg og Nauthólsvegi við rætur Öskjuhlíðar á næstu vikum,“ segir Dagur. „Það eru líka að koma inn lóðir í Úlfarsárdal. Við munum klára útboðsskilmálana vegna þeirra í næstu viku. Við erum þá búin að selja byggingarrétt fyrir um 300 íbúðir í Gufunesi þar verður nýtt og spennandi svæði þar sem kvikmyndaiðnaðurinn er að koma sér fyrir. Við verðum klár með fleiri lóðir þar seinna á þessu ári.“

Þá er þriðji áfangi Bryggjuhverfis í deiluskipulagsauglýsingu og fyrsti áfangi þess verkefnis gæti farið í uppbyggingu næsta vor. 

„Og svo er það Skerjarfjörðurinn sem er mjög spennandi svæði þar sem liggur fyrir rammaskipulag og við munum kalla þar til þróunaraðila.“

Hann segir að þessi nýju svæði sem séu að opnast bæti hundruðum íbúða við þær tæplega 1200 íbúðir sem fylgja lóðunum sem verður úthlutað nú fyrri part árs.

Hér að neðan má sjá kynningarfundinn í heild sinni.