Forstöðumaður Kvikmyndamiðstöðvar umdeildur og til skoðunar að auglýsa starfið

Hagsmunaaðilar í kvikmyndaiðnaðinum á Íslandi hafa skorað á mennta- og menningarmálaráðherra að auglýsa starf forstöðumanns Kvikmyndamiðstöðvar áður en skipunartími Laufeyjar Guðjónsdóttur rennur út um miðjan ágúst. Ef auglýsa á starfið þarf að tilkynna núverandi forstöðumanni það með sex mánaða fyrirvara og auglýsa svo.

Lilja Alfreðsdóttir, mennta- og menningarmálaráðherra, segir enga ákvörðun hafa verið tekna um það hvort starfið verði auglýst. „Ég er á þeirri grundvallarskoðun að það eigi alltaf að auglýsa eftir fimm ár þegar þú ert með svona stóra stöðu á vegum hins opinbera,“ segir Lilja. Málið sé þess vegna í skoðun.

Samkvæmt upplýsingum Fréttablaðsins sendi Samband íslenskra kvikmyndaframleiðenda erindi vegna málsins í nóvember. Samkvæmt upplýsingum Fréttablaðsins hafa forsvarsmenn einstakra framleiðenda á borð við Pegasus og Saga film líka sent erindi.

Laufey Guðjónsdóttir hefur verið forstöðumaður Kvikmyndasjóðs frá árinu 2003, eða í fimmtán ár. Þar áður var hún forstöðumaður Kvikmyndasjóðs í tvö ár. Almennt gildir sú regla um skipan forstöðumanna ríkisstofnana að þeir eru skipaðir tímabundið, til fimm ára í senn. Sé embættismanni ekki tilkynnt sex mánuðum áður en skipunartími hans rennur út að embættið verði auglýst framlengist skipunartími hans um fimm ár. Þessi regla á sér stoð í lögum um réttindi og skyldur opinberra starfsmanna og á líka við um forstöðumann Kvikmynda­miðstöðvar. Um forstöðumenn tveggja annarra menningarstofnana, Þjóðleikhússtjóra og safnstjóra Listasafns Íslands, gildir sú regla að þeir eru skipaðir að hámarki til tíu ára.

Kristinn Þórðarson, formaður Sambands íslenskra kvikmyndaframleiðenda, baðst undan viðtali þegar Fréttablaðið leitaði viðbragða frá honum. „Mér finnst eðlilegt þegar verið er að útdeila svona miklum peningum inn í svona þröngan geira að það sé skipt um mann í brúnni reglulega,“ segir Snorri Þórisson, stjórnarformaður Pegasusar framleiðslufyrirtækis. Hann segir líka að forstöðumaður Kvikmynda­miðstöðvar þurfi að berjast fyrir því að fá meiri fjármuni í sjóðinn til að hafa úr meiru að moða. „Ég hef ekki orðið var við að það hafi gerst,“ segir Snorri, en tekur þó fram að hann viti ekki hvað hafi gengið á í þeim efnum á bak við tjöldin.

Samkvæmt fjárlagafrumvarpi ársins 2018 nema fjárheimildir til Kvikmyndamiðstöðvar á árinu 1.130 milljónum króna. Þar af eru tæplega 995 milljónir króna framlag í Kvikmyndasjóð.