200 milljónir króna í nýja menntastefnu borgarinnar

Menntastefnan ber yfirskriftina Látum draumana rætast. Verkefnið var formlega kynnt í ráðhúsi Reykjavíkur í dag. Þar var meðal annars rætt um nýjar skólagerðir og áform um byggingar skóla í nýjum hverfum.

200 milljónir hafa verið tryggðar í verkefnið fyrsta árið. Skúli Helgason, formaður skóla- og frístundaráðs Reykjavíkur, segir að þeir peningar eiga að fara út í skólana.

„Við viljum sjá spennandi sjálfsprottin skólaþróunarverkefni koma frá kennurum okkar og skólastjórum ásamt aðkomu nemenda og foreldra.“

Framkvæmdin mikilvæg

Embla Nótt Pétursdóttir, nemandi í 10. bekk í Vogaskóla, hefur skoðað stefnuna. Hún segir að hún líti vel út en mikilvægt sé hvernig til takist með framkvæmd verkefnisins.

„Þar sem fullorðið fólk er að móta stefnuna þarf að fara varlega með hvernig framkvæmdin er. Mikilvægt er að leita til nemendanna og fá álit þeirra.“

Fyrstu skref innleiðingarinnar eru að útfæra hvernig fjármunum verður úthlutað, auka vægi list- og verknáms og nýta náttúruna enn frekar við skólastarf.