Hjörvar: Mikið af stjörnum sem við höfum ekki séð undanfarin ár

Hjörvar Hafliðason, sparkspekingur Stöðvar 2, býst við jöfnum og spennandi ítölskum bolta þó að Cristiano Ronaldo sé genginn í raðir ítölsku meistaranna í Juventus.

Eins og greint var frá í gær mun Stöð 2 Sport sýna frá ítalska boltanum í vetur og hefjast útsendingar um helgina.

„Juventus er besta liðið og verða enn betri að fá Ronaldo en Inter-liðið hefur ekki verið eins gott í mörg ár,” sagði Hjörvar í kvöldfréttum Stöðvar 2.

„AC Milan eru sömuleiðis öflugir og svo ertu með Róma-liðin, Roma og Lazio. Napoli hefur verið spútnikliðið undanfarin ár. Parma eru með fullt af aðdáendum á Íslandi einnig.”

„Ég held að ítalski boltinn verði jafn og spennandi. Þarna ertu með mikið af stjörnum sem við höfum ekki séð á undanförnum árum. Maður getur talað um Icardi hjá Inter, Dybala hjá Juventus, Immobile hjá Lazio.”

Allt innslagið má sjá í spilaranum hér að ofan þar sem ræðir um þróun ítalska boltans í aldanna rás.