Marsspá Siggu Kling – Ljónið: Fáðu lánaða dómgreind eða visku

Elsku hjartans tilfinningaþrungna Ljónið mitt, þú ert einhvern veginn eins og hlaðborð af öllum réttum og það er svo erfitt að útskýra þig eða þetta hlaðborð, en hversu spennandi er ekki sú manneskja sem þú í raun og veru getur ekki útskýrt? Þú kemur alltaf á óvart og sýnir stanslaust á þér nýjar hliðar.

Þú ert að vaxa svo í andlegum þáttum og ert að finna svo mikla visku í því sem þú ert að gera; þú ert hér á jörðinni til þess að þróa þig og hafa áhrif allt í kringum þig með góðum sögum af því hvernig þú náðir árangri í gegnum erfiðleika, tilfinningaþrot og allt hið þunga frá myrkrinu til þess að sjá sólina aftur. Engin saga er eins mögnuð og þín svo láttu engan ráða söguþræðinum heldur hafðu trú á því að þú sért skapari ævisögunnar þinnar. Þú verður að hafa trú á þessu litla kettlingi í hjarta þínu til þess að geta öskrað eins og þetta öfluga Ljón sem við berum öll virðingu fyrir.

Stundum veit maður ekki hvenær maður á að stoppa eða hversu langt maður má ganga, því að sjálfsögðu ert þú ekki fullkominn sem er líka bara svo drepleiðinlegt að vera, svo fáðu lánaða dómgreind eða visku frá þeim sem þú treystir og þú veist að bera hag þinn fyrir brjósti og ef einhver er virkilega elskaður þá ert það svo sannarlega þú og þetta merki sem þú dvelur í.

Júpíter er í seglunum þínum, verður þér til halds og trausts og boðar þér lukku, þér finnst allt svo staðnað núna og þú sérð ekki alveg hvað framtíðin mun gefa þér, en framtíðin er bara ekki til elskan mín, hún er ekki til því það er bara augnablikið núna sem er til svo augnablikið ER sjálf framtíðin.

Þú ert dásamleg manneskja, hreinn snillingur, hefur útgeislun eins og lítill kettlingur sem allir vilja eiga og dásama, en hentu reiðinni því hún er eina hindrunin að þeirri framtíð sem þú átt skilið.

Fræg Ljón: Cara Delevingne fyrirsæta, Ágústa Eva Erlendsdóttir, leik- og söngkona, Halldóra Geirharðsdóttir leikkona, Birgitta Haukdal söngkona, Barack Obama Bandaríkjaforseti, Ásdís Rán fyrirsæta, Gísli Gíslason geimfari, Geir Ólafsson söngvari, Þórunn Antonía alheimsstjarna, Albert Eiríks, matgæðingur af bestu sort, Jón Óttar Ragnarsson, athafna- og fjölmiðlamaður, Jennifer Lopez söngkona, Diddú, Sirrý Arnardóttir fjölmiðlakona, Arnór Dan, söngvari, Agent Fresco, Ana Mafalda, besta húshjálp í heimi, Sema Erla Serdar, baráttukona, Rósa Ingólfsdóttir, sjónvarpskona, Anton Máni Svansson, kvikmyndaframleiðandi, Hulk. 

Setningin þín er: Nei eða Já (Sigga Beinteins Ljón & Stjórnin)