Stundin hlaut blaðamannaverðlaunin fyrir umfjöllun um uppreist æru

Ritstjórn Stundarinnar vann blaðamannaverðlaunin fyrir ítarlega umfjöllun um uppreist æru kynferðisbrotamanna, áhrif þess á fórnarlömb mannanna og tregðu stjórnvalda til upplýsingagjafar.

Verðlaunin voru afhent í dag í Hörpu.

Viktoría Hermannsdóttir dagskrárgerðarkona á RÚV hreppti verðlaun fyrir viðtal ársins en hún tók viðtal við og sagði sögu Árna Jóns Árnasonar í þættinum Á ég bróður á Íslandi?. Þátturinn fjallaði um bandarískan mann sem hafði samband við Viktoríu eftir útgáfu þáttanna Ástandsbörn á RÚV. Manninn grunaði að hann ætti bróður á Íslandi því faðir hans hafði sinnt herskyldu hér í síðari heimstyrjöldinni. Á ég bróður á Íslandi? fjallar um leit hins bandaríska David Balsam að bróður sínum. Í tilnefningu blaðamannafélagsins segir að viðtalið við Árna Jón hafi verið einstök og falleg sýn í líf manns þegar hann fær þær fréttir að hann eigi hálfbróður og hittir í fyrsta sinn.

Alma Ómarsdóttir, einnig á RÚV, hlaut verðlaun fyrir rannsóknarblaðamennsku ársins fyrir upplýsandi og heildstæða umfjöllun um hverjir hlutu uppreist æru, hverjir voru meðmælendur þeirra og áhrif uppreistarinnar á brotaþola.

Þá hlaut Sunna Ósk Logadóttir blaðamaður á Morgunblaðinu verðlaun fyrir umfjöllun ársins. Hlaut hún verðlaunin fyrir að reifa skilmerkilega hvernig raforkuþurrð til náinnar framtíðar kallar á ákvarðanir um hvort draga þurfi úr notkun hennar eða virkjameira og ólík sjónarmið þar um.

 

Myndir ársins

Á sama tíma og verðlaunin voru afhent var opnuð ljósmyndasýning Blaðamannafélags Íslands sem ber heitið Myndir ársins. Þá voru veitt átta verðlaun fyrir myndir ársins 2017.

Mynd ársins tók Stefán Karlsson, ljósmyndari Fréttablaðsins. Myndin sýnir Nínu Rún Bergsdóttur sitja í stól húðflúrara sem er að flúra orðin „I am the storm“ á öxl Nínu. Hún er þar ásamt konum sem allar fengu sér sama húðflúrið og höfðu allar orðið fyrir kynferðisofbeldi af hálfu Robert Downey. 

Eyþór Árnason sem einnig er ljósmyndari Fréttablaðsins hlaut verðlaun fyrir fréttamynd ársins 2017 en myndin sýnir björgunarsveitarmenn leita að Birnu Brjánsdóttur í upphafi síðasta árs. 

Heiða Helgadóttir hlaut verðlaun fyrir myndröð ársins og portrait ársins, Kristinn Magnússon fyrir bestu íþróttamynd ársins, Hörður Sveinsson fyrir bestu umhverfismynd ársins, Heiðdís G. Gunnarsdóttir fyrir að hafa fangað bestu mynd í flokki daglegs lífs og Aldís Pálsdóttir hlaut verðlaun fyrir tímaritamynd ársins 2017. Myndirnar má sjá hér að neðan.

Á sýningunni eru 105 myndir sem valdar voru af sjö dómurum. Innsendar myndir voru 732 talsins.