Íbúar Vesturbæjar óttaslegnir vegna blásaklauss ljósmyndara

Ljósmyndari DV komst í hann krappann á dögunum þegar hann var tilkynntur til lögreglu fyrir grunsamlega hegðun í Vesturbænum. Sigtryggur Ari Jóhannsson ljósmyndari DV var fenginn í það verkefni að mynda hús sem eru í eigu Gylfa Þórs Sigurðssonar landsliðsmanns í knattspyrnu og íbúum hússins þótti hann svo grunsamlegur að haft var samband við lögreglu.

Íbúi í húsinu varð var við ferðir Sigtryggs og fanns hann hegða sér grunsamlega og sagði hann hafa hraðað sér á brott þegar eiginkona hans hefði viljað eiga við hann orð. Íbúinn brá á það ráð að segja frá upplifun sinni á Facebook síðu sem ber heitið Vesturbærinn og er umræðuvettvangur fyrir íbúa hverfisins.

Sigtryggur segir að nokkuð margir hafi verið búnir að deila innlegginu og fjallað var um málið á mbl.is. „Mér var bent á þetta og þá var kominn einhver hiti í málið og lýsingar á því hvernig ég hefði farið að,“ segir hann og bætir við að lýsingarnar komi alveg ekki heim og saman við hans upplifun.

Í innlegginu á Facebook var tekið fram bílnúmer bílsins sem Sigtryggur ók og einnig að málið hafi verið tilkynnt til lögreglu. „Í bílnum situr maður sem er að fylgjast með húsinu, upp úr þurru tekur hann upp myndavél og fer að smella af myndum af húsinu okkar og þeim sem í því voru stödd á þessum tíma. Þegar konan mín hleypur út til þess að spyrja manninn um nafn og erindi hans þá brennur hann af stað og hverfur út botnlangann á háum hraða,“ segir í innlegginu.

„Ég tók mynd og var ekkert að flýta mér þannig lagað séð, en það var nú sagt í færstlunni að ég hefði skransað í burtu þegar íbúinn hafi ætlað að ná tali af mér,“ segir Sigtryggur. Þá segir hann að líklega stafi innleggið af hræðslu við innbrotsgengi sem mikið hefur verið fjallað um að undanförnu.

Sigtryggur segir að hann hafi einungis verið að vinna, en hann var með lista af húsum sem hann átti að taka myndir af. „Ég get ekkert hafnað því að ég var að taka myndir af húsum. Þetta var á dagvinnutíma sem er hentugt því fréttin sem um ræðir fjallaði ekki um fólkið sem á heima í húsunum, heldur manninn sem á þau. Ég hugsaði að það væri þægilegt að sem fæstir yrðu fyrir því að sitja heima og einhver maður með stóra myndavél væri að potast í húsinu þeirra,“ segir Sigtryggur sem segist hafa orðið var við bíl í innkeyrslu hússins en segir að hann hafi ekki stressað sig á því.

Eftir að kom í ljós að Sigtryggur væri ekki að mynda hús í vafasömum tilgangi þá var innlegginu eytt af Vesturbæjarsíðunni. Íbúar Vesturbæjar ættu því ekki að óttast manninn með stóru myndavélina og lögreglan þarf ekki að rannsaka málið frekar. „Löggurnar hafa að minnsta kosti ekki verið að stoppa mig,“ segir Sigtryggur kíminn.