Slasaður skíðagöngumaður sóttur upp á hálendi

Björgunarsveitir á Suðurlandi og í uppsveitum Árnessýslu voru kallaðar út í dag eftir að hjálparbeiðni barst frá gönguskíðamanni sem hafði slasast á hálendinu. Hann var einn á ferð og hafðist við í tjaldi suður af Hofsjökli. Tveimur tímum eftir að útkallið barst kom björgunarsveitarfólk að manninum og var ástand hans gott miðað við aðstæður, samkvæmt tilkynningu frá Landsbjörgu.

Hann er nú á leið til byggða með björgunarsveitabíl. Hlúð var að honum á staðnum og verður hann svo fluttur með sjúkrabíl til frekari aðhlynningar.

Samkvæmt tilkynningunni virðist sem að maðurinn, sem hefur verið á ferð um hálendið síðustu daga, hafi gert nánast allt rétt. Hann var vel útbúinn með GPS-tæki og neyðarsendi og hafði skilið eftir ferðaáætlun og upplýsingar um sig á Safetravel.is. Það mun hafa auðveldað björgunaraðgerðina mjög.