„Ansi margir að missa vinnuna sína“

Hjónin Bjarney Jóhannsdóttir og Logi Sigurjónsson hafa undanfarin fjögur ár verið með umboðið fyrir Tupperware á Íslandi en þau standa nú á tímamótum því Tupperware hefur ákveðið að hætta að selja vöruna hér á landi og sagði nýverið upp samningunum við Frostís heildverslun sem þau hjónin eiga.

„Það sem er að gerast núna er að það var tekin ákvörðun um þessa skipulagsbreytingu á Evrópumarkaði. Í þessari skipulagsbreytingu fannst þeim þeir þurfa að loka markaðnum á Íslandi, þó að Tupperware sé eftirsótt hér. Við höfum til dæmis verið að ná unga fólkinu inn og erum núna að selja til þriggja kynslóða. Ráðgjafar okkar eru á öllum aldri og það ríkir góður andi í hópnum,“ útskýrir Bjarney sem er að vonum ósátt við þessa ákvörðun.

„Ég vil meira að segja meina að áhuginn sé upp á við og það er metnaður hjá ráðgjöfum að þjónusta vel sína viðskipavini.“

Bjarney og Logi eru með 113 ráðgjafa á skrá hjá sér sem selja Tupper­ware áfram til viðskiptavina. „Af þeim 113 eru svona 30-70 virkir, eftir vikum, þannig að það eru ansi margir að missa vinnuna sína.“

Bjarney hafði samband við Tupper­ware í Ameríku til að kanna hvort hægt væri að fá vörurnar frá Ameríkumarkaði en hún fékk þau svör að það væri ekki hægt að svo stöddu.

„Já, fólk er mjög svekkt. Ég hef fengið fullt af viðbrögðum. Fólk er ekki sátt við að missa vöruna af markaðinum hjá okkur.“

Markmiðið að komast inn á öll íslensk heimili

Tupperware hefur verið á markaði á Íslandi frá árinu 1989 og segir Bjarney að á þeim tíma hafi merkið náð mikilli fótfestu hér á landi. „Það er breiður neytendahópur sem kaupir Tupper­ware enda hefur það verið okkar markmið að komast „inn“ á öll heimili á landinu.“

Hver er galdurinn á bak við vinsældirnar? „Þessar heimakynningar eru sérstaða Tupperware. Þessi persónulegu viðskipti og ráðgjöf sem við veitum. Við viljum t.d. ekki selja fólki eitthvað sem það notar ekki. Svo er það ábyrgðin en Tupperware hefur ávallt bætt verksmiðju- og efnisgallaðar vörur en nú bíðum við eftir svörum frá þeim um hvað verður hér eftir. Þeir leggja línuna upp núna að bæta þannig galla á vörum sem eru yngri en tveggja ára.“

Spurð út í hvaða Tupper­ware-vöru hún haldi að fólk muni sakna mest segir Bjarney: „Það er erfitt að svara. Hnoðskálin er til dæmis eitthvað sem flestir þekkja, sú skál er til á mjög mörgum heimilum. En í dag tölum við mikið um saxarana okkar sem spara okkur tíma við eldamennskuna. Svo eru það grænmetisílátin og örbylgjuvörurnar. Það er erfitt að nefna eitt því línan er svo breið.“