Búið að úrskurða í öllum kærum varðandi nýjan þjóðveg

Búið er að úrskurða í öllum kærum varðandi nýjan þjóðveg yfir Hornafjarðarfljót. Þar á meðal kröfu kærenda um ógildingu á ákvörðun bæjarstjórnar Hornafjarðar frá 1. desember 2016 um að veita framkvæmdaleyfi vegna Hringvegar milli Hólms og Dynjanda. Framkvæmdir eru nú þegar hafnar á veginum á Mýrum en Vegagerðin á þó eftir að semja við nokkra landeigendur.

Í úrskurði Úrskurðarnefndar umhverfis- og auðlindamála segir að fyrirhuguð framkvæmd hafi verið metin með fullnægjandi hætti í því mati sem fram fór á umhverfisáhrifum við gerð nýs vegar. Að mati kærenda hefur sú leið sem samþykkt var að fara óafturkræf umhverfisáhrif enda mikið lífríki í firðinum.

Deila um nýjan veg yfir Hornafjarðarfljót hefur núna staðið yfir í rúman áratug. Lagðar voru fyrir þrjár leiðir, leið 1, 2, 3 og síðar leið 3b. Leið 3b var valin því sú breyting hafði mesta styttingu á Hringveginum. Úrskurðarnefnd taldi að samfélagslegur ávinningur af vali á leið 3b vægi þyngra en neikvæð umhverfisáhrif hennar umfram leið 1, sem hefur minni umhverfisáhrif en fyrrnefndar leiðir. Umferðaröryggi til almannahagsmuna verður að telja brýna ef sýnt þykir að ein veglína leiði til meira umferðaröryggis umfram aðra.

Stór hluti þess svæðis sem fyrirhugaðar veglínur fara í gegn er aðallega landbúnaðarland, að mestu tún og beitilönd. Bæði í Nesjum og á Mýrum er mikið um landbúnaðarlandslög, þar sem umhverfinu hefur verið breytt til þess að nýta það í landbúnað. Slegin tún, beitilönd, skurðir, kartöflugarðar og skógrækt falla undir flokkinn landbúnaðarlandslag en landbúnaðarlandslög njóta ekki sérstakrar verndar sem slík.

Með þessum breytinum mun Hringvegurinn styttast um 12 til 13 kílómetra og verður í kjölfarið þremur einbreiðum brúum færri.

Formaður bæjarráðs Hornafjarðar, Sæmundur Helgason, fagnar þessum niðurstöðu og er því ekkert til fyrirstöðu að setja fullan kraft í framkvæmdir. Segir hann að þessi samgöngubót og vegstytting sé umtalsverð og hefur mikla þýðingu fyrir íbúana, styttir vegalengdir í þjónustuna á Höfn og stóreykur umferðaröryggi. Skólaakstur mun til að mynda styttast um 26 km á dag. Treystir hann því að ríkið standi við samþykkta vegaáætlun frá hausti 2016 og komi með fjármagn í væntanlegum fjárlögum.