Fiskþurrkun ein í nýju iðnaðarhverfi Ölfuss

Bæjaryfirvöld í Ölfusi geta ekki svarað hver kostnaður sveitarfélagsins verður vegna framkvæmda við nýtt iðnaðarhverfi þangað sem flytja á fiskþurrkun Lýsis í Þorlákshöfn. Ljóst er að kostnaðurinn verður í upphafi nokkru hærri en innheimt lóðargjöld þar sem ekkert annað fyrirtæki hefur sóst eftir lóð.

Ölfus og Lýsi sömdu í október í fyrra um að fyrirtækið þyrfti innan fimm mánaða að taka ákvörðun um hvort það myndi byggja nýja fiskþurrkunarverksmiðju á iðnaðarsvæðinu vestan Þorlákshafnar eða loka eldri verksmiðju sinni í bænum fyrir júní 2018. Íbúar í Þorlákshöfn höfðu þá um langt skeið kvartað undan ólykt af starfseminni en Lýsi hefur leyfi til að framleiða 40 tonn af hráefni á sólarhring í bænum.

Mun sveitarfélagið sjá um gatnagerð að lóð Lýsis og stofnlögn fráveitu, og fyrirtækið ekki þurfa að greiða umfram 20 milljónir króna í gatnagerðargjöld. Einnig á að leggja veitur fyrir heitt vatn, kalt vatn, fráveitu út í sjó, rafmagn og ljósleiðara og er nú unnið að hönnun og kostnaðargreiningu. Þær framkvæmdir munu ekki einungis nýtast nýja iðnaðarsvæðinu heldur einnig bjóða upp á möguleika á hringtengingu á heitu og köldu vatni í Þorlákshöfn.

„Það liggur ekki endanlega fyrir hver kostnaður verður við stofnframkvæmdir. Veitulagnaleiðin er um fjórir kílómetrar í heild og koma veituaðilar á mismunandi stöðum inn á hana. Stofnlögn fráveitu er um 500 metrar. Við gerum okkur grein fyrir því að framkvæmdakostnaður í upphafi verður nokkru hærri en gjaldtakan af Lýsi sem er eðlilegt þegar nýtt hverfi er skipulagt og tekið í gagnið. Væntum þess að samfélagsáhrifin verði mikil og jákvæð og við munum með markvissum hætti auglýsa lóðir á svæðinu á næstunni,“ segir Gunnsteinn R. Ómarsson, bæjarstjóri Ölfuss, í skriflegu svari til Fréttablaðsins.

„Þó svo ekki sé búið að úthluta þarna fleiri lóðum finnum við fyrir áhuga á svæðinu. Vegna þessa er ekki hægt að segja að sveitarfélagið verði sérstaklega að ráðast í kostnað vegna uppbyggingar Lýsis í hverfinu því allt sem framkvæmt er af hálfu sveitarfélagsins mun nýtast við áframhaldandi uppbyggingu,“ segir Gunnsteinn. Bæjarstjórinn bætir við að í fyrsta áfanga framkvæmdanna verði lagður 120 metra vegur inn í hverfið, að lóð Lýsis, sem verði svo lengdur í áföngum eftir því sem iðnaðarhverfið byggist upp.

Guðmundur Oddgeirsson, bæjarfulltrúi Ö-listans, sat hjá er samkomulagið við Lýsi var samþykkt.

„Ég er enn á því að Lýsi eigi að loka fiskþurrkuninni þegar í stað enda er umhverfissóðaskapurinn sem viðgengst með því að dæla ólofti yfir heimili íbúa og gesti Þorlákshafnar með öllu ólíðandi. [...] Ekki á að gefa neinn afslátt af starfsleyfisskilyrðum,“ bókaði Guðmundur þá.