Engin losun efna er fyrirsjáanleg í andrúmsloft, vatn eða jarðveg vegna leitar Advanced Marine Services (AMS) í flaki þýska flutningaskipsins Minden. Þá telur AMS að engin mengunarhætta sé á ferðinni í tengslum við leitina.
Það vakti mikla athygli þegar leitað var í skipinu á vormánuðum. Þá hafði Landhelgisgæslan afskipti af skipinu og það var flutt til hafnar hér á landi. Samtímis var AMS tilkynnt um að ætlaði fyrirtækið sér að halda leit áfram á svæðinu þyrfti það starfsleyfi samkvæmt lögum um hollustuhætti og mengunarvarnir. Sótt var um slíkt leyfi síðla í apríl.
Í umsókninni kemur fram að aðgerðin sé í eðli sínu einföld og áhættulaus. Skorið verður í vegg sem síðar verður beygður frá kassa sem AMS telur að geti innihaldið verðmæti. Áætlað er að verkið muni taka 24-28 klukkustundir séu veðurskilyrði eins og best verður á kosið. Þá var þess farið á leit að leyfisveitingin yrði afgreidd með hraði, helst á tímabilinu 1. til 7. maí, vegna þess kostnaðar sem felst í því að hafa skipið Seabed Constructor á leigu.
UST hefur nú birt á heimasíðu sinni tillögu að starfsleyfinu. Þar er gert ráð fyrir að tilkynna þurfi upphaf og lok framkvæmdarinnar, skila þurfi viðbragðsáætlun byggðri á áhættumati, skila þurfi skýrslu um framkvæmdina. Hægt er að gera athugasemdir við tillöguna á næstu fjórum vikum.
Tillaga að leitarleyfi í Minden
Tengdar fréttir
Ráðuneyti segja pass við leit að fjársjóði í skipsflaki úr stríðinu
Þar sem ekki er um vísindarannsókn að ræða tekur utanríkisráðuneytið ekki afstöðu til þess hvort leita megi verðmæta í flaki þýska skipsins Minden. Dómsmálaráðuneytið svarar ekki spurningum um málið.
Vilja ná í fjársjóðskistu í póstherbergi Minden
Félagið Advanced Marine Services vill starfsleyfi til að ná í kassa með góðmálmum sem það kveðst hafa fundið í póstherbergi þýska flutningaskipsins Minden sem liggur á 2.242 metra dýpi undan Íslandi. Umhverfisstofnun skoðar málið.
