Áramótaveisla fyrir hælisleitendur í annað sinn

Þórunn Ólafsdóttir, formaður samtakanna Akkeri stendur ásamt hópi sjálfboðaliða fyrir áramótaveislu fyrir hælisleitendur á gamlárskvöld. Fögnuðurinn fer fram í Ráðhúsi Reykjavíkur og byrjar klukkan 18.

Þetta er í annað sinn sem samtökin halda veislu af þessu tagi fyrir hælisleitendur en veislan í fyrra var notaleg stund að sögn Þórunnar.

Vilja brjóta upp hversdagsleika hælisleitenda

„Þessi hugmynd kviknaði af því okkur langaði að bjóða fólki upp á eitthvað sem væri skemmtilegt og notalegt og brjóta aðeins upp þennan hverdag sem fólk býr við hérna,“ segir Þórunn og talar um þá sem bíða eftir svari við umsóknum sína um alþjóðlega vernd.

Þórunn segir að áramótin og hátíðirnar í kringum jólin séu oft einmanalegur og erfiður tími fyrir fólk. „Það eru allir að skemmta sér og það eru hátíðir en samt er hverdagurinn alveg sá sami þegar maður er í þessum aðstæðum. Við ákváðum að sjá hvort við gætum ekki gert eitthvað til að brjóta það upp.“

Hugmyndin vatt upp á sig og að lokum var haldin stór veisla í ráðhúsinu þar sem vel á fjórða hundrað manns mætti og fagnaði nýju ári saman.

„Í fyrra var þetta voðalega afslappað, ekki standandi partý og það var mikið af fjölskyldum sem komu. Það voru smáréttahlaðborð og svo komu Megas og Magga Stína og skemmtu. Fólk naut þess að vera saman og spjalla, það var mjög afslappað og skemmtilegt,“ segir Þórunn.

Engar almenningssamgöngur á gamlárskvöld

Þórunn segir að erfitt sé að segja til um þann fjölda hælisleitenda sem munu leggja leið sína í ráðhúsið á gamlárskvöld. „Það eru fleiri hælisleitendur á landinu núna í ár skilst mér. Við eru mekki með neina skráningu og gerum ekki þá kröfu að fólk skuldbindi sig til að mæta, það eru bara allir velkomnir.“

Í fyrra var veislan frá klukkan átta til klukkan eitt eftir miðnætti en í ár verður veislan ekki svo lengi fram eftir. „Það var mikið af börnum í fyrra og því ekki mikil þörf á að hafa þetta yfir miðnætti. Í ár stefnum við á að vera fram eftir kvöldi, til klukkan tíu eða ellefu,“ segir Þórunn.

Engar almenningssamgöngur eru á gamlárskvöld og því munu gestum standa til boða að fá far með rútu sem Akkeri útvegar. Þó leita samtökin enn að bílstjóra sem er tilbúinn til að aðstoða þau og keyra rútuna.

Leita enn að sjálfboðaliðum

Fjöldi fyrirtækja og einstaklinga hafa lagt sitt af mörkum til þess að láta verða af fögnuðinum. Í boði verður matur og skemmtun að sögn Þórunnar, en erfiðlega hefur gengið að finna skemmtiatriði. 

„Það er reyndar skiljanlegt á gamlárskvöld þar sem þetta er stórt kvöld í þeirra bransa. Við erum enn að leita en það eru nú þegar einhverjir búnir að bjóða fram aðstoð sína, en það er aldrei of mikið af skemmtiatriðum,“ segir Þórunn glaðleg.

„Við erum líka enn að leita að bílstjóra með meirapróf og það væri mjög gott að vita af fólki sem væri tilbúið að aðstoða okkur.“

Allir velkomnir

Þórunn segir að áramótaveislan sé síður en svo einungis fyrir hælisleitendur, heldur séu allir velkomnir. „Það er ekki þannig að þú þurfir að vera hælisleitandi eða sjálfboðaliði til þess að komast inn. Ef fólk vill koma og gera kvöldið skemmtilegt fyrir alla þá eru dyrnar opnar.“

Áramótafögnuðurinn í ráðhúsinu á síðasta ári vakti mikla athygli, einnig utan landsteinanna. „Þetta er auðvitað stórt mál í heiminum, fólk á flótta og allar þessar aðstæður og það er einstakt að ráðhús höfuðborgar sé opnað fyrir fólki til að koma og hafa gaman. Reykjavíkurborg á hrós skilið fyrir það,“ segir Þórunn. Reykjavíkurborg bauð fram ráðhúsið í fyrra og gerir það aftur núna.