Fleiri konur sóttu sjóinn fyrr á öldum en menn hafa talið

Konur voru mun virkari í sjósókn og fjölmennari í verbúðum fyrir alda, en til þessa hefur verið talið, og voru engir hálfdrættingar. Þetta er mat sagnamanns á Snæfellsnesi sem rýnt hefur í fornar heimildir.

Um þetta var fjallað í frétt Stöðvar 2, sem sjá má hér að neðan, og hér í þættinum Ísland í sumar, um Dritvík á Snæfellsnesi, en þar var leiðsögumaður Sæmundur Kristjánsson á Rifi.

Dritvík á Snæfellsnesi var um aldir ein stærsta verstöð Íslands og þaðan er talið að yfir 500 manns hafi róið ár hvert á vetrarvertíð. Sæmundur Kristjánsson telur konur hafa verið fjölmennari en til þessa hafi verið talið og vitnar til heimilda.

Dæmi um það sé sjóslys þegar bátur úr Fagurey fórst í lendingu í Dritvík árið 1809 en tvær konur voru um borð. Þær björguðust báðar. Í heimildum um átta skipsskaða á fyrri hluta nítjándu aldar komi tólf konur við sögu.

Þá er heimild til um að kona hafi tekið þátt í björgun og fengið björgunarlaun til jafns við karlana. Það telur Sæmundur sönnun þess að konur hafi ekki verið hálfdrættingar heldur tekið sama hlut og karlarnir.