Elsta kona heims látin

Emma Morano, elsta núlifandi manneskja í heimi, lést í dag á heimili sínu í bænum Verbaria á Ítalíu 117 ára að aldri. Þetta kemur fram í yfirlýsingu frá lækni hennar. Associated Press greindi frá.

Emma Morano var fædd þann 29. nóvember árið 1899 í Civiasco í Piedmont-héraði á Ítalíu. Hún var ekki einungis elsta manneskja heims heldur einnig síðasta manneskjan, sem enn var á lífi árið 2017, til að fæðast á 19. öld.

Læknir Morano, Dr. Carlo Bava, sagðist síðast hafa vitjað Morano á föstudag. Hún hafði þá þakkað honum fyrir aðhlynninguna og haldið í höndina á honum eins og venjulega. 

Titill elstu núlifandi manneskjunnar færist nú í hlut hinnar 117 ára Violet Brown. Hún fæddist þann 10. mars árið 1900 og býr á eyjunni Jamaica.