Fleiri ökumenn nota handfrjálsan búnað undir stýri

Fjörutíu og sjö prósent Íslendinga segjast hafa talað í farsíma undir stýri án handfrjáls búnaðar á síðastliðnum 12 mánuðum samkvæmt niðurstöðum úr nýrri könnun MMR. Það er 9 prósentustiga fækkun frá sömu könnun fyrir ári síðan. Þá hefur fjöldi þeirra sem tala í farsíma með handfrjálsum búnaði aukist nokkuð.

Þeim sem tala í símann undir stýri án handfrjáls búnaðar hefur fækkað stöðugt frá árinu 2010 en 71% svarenda kváðust tala í símann án handfrjáls búnaðar árið 2010. Á móti hefur fjöldi þeirra sem tala í símann undir stýri með handfrjálsum búnaði aukist úr 24% árið 2010 í 44% árið 2017.

Þriðjungur yngsta aldurshópsins les og skrifar skilaboð undir stýri

Yngsti aldurshópurinn, 18-29 ára, var líklegri til að segjast hafa notað farsíma undir stýri til að skrifa og lesa skilaboð og taka myndir. Þá kváðust 17% þess aldurshóps nota farsímann undir stýri til að fara á Internetið.

Ef það er borið saman við niðurstöður frá árinu 2016 má sjá töluverða breytingu á farsímanotkun undir stýri meðal ungs fólks en þá kváðust 45% fólks á þessum aldri hafa notað símann undir stýri til að skrifa og lesa skilaboð, 29% kváðust nota símann til að taka myndir og önnur 29% sögðust hafa notað símann til að fara á netið.