Einn geðlyfjaskammtur á mann á Mörk

„Ég vildi óska þess að hægt væri að sleppa þeim alfarið en þau þurfa að fylgja með, því miður,“ segir Gísli Pálsson, framkvæmdastjóri hjúkrunarheimilisins Markar, þar sem keyptir voru 36 þúsund dagskammtar af sterkum þunglyndis- og geðlyfjum í fyrra.

Um þrjátíu prósent vistmanna á Mörk nota sterk þunglyndislyf í öðrum tilfellum en mælt er með samkvæmt gæðavísi Landlæknisembættisins frá í febrúar.

Mörk er á Suðurlandsbraut. Þar eru hjúkrunarrými fyrir 113 einstaklinga, tíu til dagvistar og tuttugu fyrir einstaklinga yngri en 67 ára. Að meðaltali eru notaðir 98 dagskammtar af sterkum þunglyndislyfjum. Þar fyrir utan eru keyptir nokkur þúsund dagskammtar af svefnlyfjum fyrir vistmenn.

Gísli Páll Pálsson segir stefnuna þá að minnka lyfjanotkun sem mest. „Við vinnum eftir ákveðinni stefnu um að fá fólk til að ákveða sjálft hvernig það nýtur lífsins og leyfa íbúum að ráða sér eins mikið og hægt er en því miður þarf auðvitað alltaf að nota lyf með,“ segir hann.

Samkvæmt gæðavísi Landlæknis notuðu um þrjátíu prósent vistmanna á Mörk sterk þunglyndislyf í öðrum tilfellum en mælt var með. Það sé í efri viðmiðum og talið lýsa vandamáli varðandi umönnun og meðferð íbúa. Úrbóta sé þörf.

Gísli Páll segir að undanfarin ár hafi verið reynt að minnka lyfjanotkun. „Við hittumst mjög reglulega til að ræða gæðavísa stofnunarinnar. Markmiðið er að halda okkur innan þeirra marka sem okkur eru sett,“ segir hann.

Laura Scheving Thorsteinsson, staðgengill sviðsstjóra eftirlits og gæða hjá embætti landlæknis, segir mikið eftirlit með lyfjagjöfum á stofnunum í dag. „Þessi íslensku viðmið voru sett á sínum tíma af fagfólki,“ segir Laura „Langlíklegast er að þeir sem taka slík lyf (sterk geðlyf) án þess að vera greindir með alvarlega geðsjúkdóma séu órólegir eða með einhvers konar hegðunarvandamál sem geta tengst vitrænni skerðingu.“



Fréttin birtist fyrst í Fréttablaðinu.

Leiðrétting: Rangt var haft eftir Lauru Scheving Thorsteinsson í upphaflegri frétt. Fréttin hefur verið uppfærð vegna þessa. Beðist er velvirðingar á þessum mistökum.