Ekið á tíu ára dreng

Lögreglunni á höfuðborgarsvæðinu barst í gær tilkynning um að ekið hefði verið á tíu ára dreng. Hann kvartaði undan eymslum í andliti og líkama og var fluttur með sjúkrabíl á Slysadeild til aðhlynningar. Óhappið var við biðstöð strætisvagna og sagðist ökumaður bílsins ekki hafa séð drenginn fyrr en við óhappið.

Þetta kemur fram í dagbók lögreglu.

Maður og kona voru handtekin í Hafnarfirði en þau eru grunuð um líkamsárás og að tálma störf lögreglu. Þau voru mjög ölvuð og voru vistuð í fangageymslu í nótt. Þá var maður handtekinn í Hraunbæ vegna gruns um líkamsárás. Sá var í mjög annarlegu ástandi og er ekki vitað um meiðsl árásarþola.

Mikið var um ölvunarakstur og/eða akstur undir áhrifum fíkniefna á höfuðborgarsvæðinu í gærkvöldi og í nótt.