Tilvalið áramótaheit að gerast blóðgjafi

Mikið álag hefur verið á heilbrigðisstofnanir í dag vegna rútuslyssins sem varð skammt frá Kirkjubæjarklaustri í morgun. Auk mikilla anna hjá viðbragðsaðilum á vettvangi hefur einna mest álag verið á bráðamóttöku Landspítalans, Heilbrigðisstofnun Suðurlands og í Blóðbankanum. Landspítalinn var settur á gult viðbragðsstig vegan slyssins í morgun og kalla þurfti út allar hendur á dekk.

Í kjölfar slyssins í morgun hvatti Blóðbankinn blóðgjafa í O-flokki til að koma og gefa blóð og voru þeir ekki lengi að bregðast við. Opnunartími blóðbankans var jafnframt lengri í dag en venjulega á miðvikudögum og er opið til klukkan sjö í kvöld og á morgun.

„Við áttum að morgni dags rúmlega 600 einingar, þar af 350 af blóðflokki O og að öllu jöfnu er það góður viðbúnaður og alveg í takt við það sem að við búum okkur undir, við þessar aðstæður þá verður maður líka að hafa virðingu fyrir því sem að getur komið og orðið óvænt,“ segir Sveinn Guðmundsson, yfirlæknir í Blóðbankanum.

Sem stendur er ekki leitað að nýjum blóðgjöfum heldur aðeins þeim sem áður hafa gefið blóð. „Það er það sem kemur að bestu gagni við þessar aðstæður. „Við viljum ekki fá í dag fólk sem hefur hugsað sér að gerast blóðgjafar, nýjir blóðgjafar, við bendum á að bara strengja þess heit um áramótin að gerast blóðgjafar á árinu 2018 og koma eftir áramótin. Þá kemur þeirra blóðgjöf að jafn miklum notum,“ segir Sveinn.

Einn annasamasti dagur ársins

„Það komu til okkar tólf sjúklingar í tveimur þyrlum laust fyrir klukkan hálfþrjú og það eru þeir sem eru meira slasaðir og það er það fólk sem við erum að vinna við að bjarga núna,“ segir Ólafur Baldursson, framkvæmdastjóri lækninga á Landspítalanum.

Dagurinn í dag, 27. desember, er alla jafna einn af annasömustu dögum ársins á spítalanum og jókst álagið í dag enn frekar vegna slyssins. Ólafur segir þó vel hafa gengið í dag miðað við aðstæður.

„Þetta kemur á okkur á álagstíma og er heilmikið verkefni, samstarfið við heilbrigðisstofnanir á suðurlandi og annarsstaðar á landinu hefur verið mjög gott og eins við samhæfingarmiðstöðina í Skógarhlíð og það byggir allt svona viðbragð mjög mikið á góðu samstarfi margra aðila,“ segir Ólafur.

Á meðan álagið er hvað mest beina stjórnendur spítalans þeim tilmælum til fólks að leita frekar til heilsugæslu eða á læknavakt, í þeim tilfellum sem veikindi eða meiðsli eru minniháttar.

„Við höfum annað þessu hingað til í dag en það má búast við einhverjum töfum í dag á þjónustunni en okkur sýnist að við séum svona að ná tökum á stöðunni núna,“ sagði Ólafur þegar fréttastofa Stöðvar 2 ræddi við hann seinni partinn í dag