Kostnaðarþátttaka grunnskólabarna fer hæst upp í 22.300 krónur

Að minnsta kosti 40.859 börn, eða 94% grunnskólanemenda landsins, búa í sveitarfélögum þar sem búið er að taka ákvörðun um að afnema kostnaðarþátttöku vegna námsgagna á næsta skólaári.

Velferðarvaktin fól Maskínu að gera könnun á kostnaðarþátttöku grunnskólabarna í skólagögnum í byrjun hausts. Velferðarvaktin var stofnuð að frumkvæði stjórnvalda snemma árs 2009 og er óháður greiningar- og álitsgjafi sem leggur fram tillögur til stjórnvalda og hagsmunasamtaka og fylgir þeim eftir.

Í kjölfar könnunarinnar hvatti Velferðarvaktin öll sveitarfélög til þess að skoða niðurstöður hennar í tengslum við gerð fjárhagsáætlana sinna fyrir næsta skólaár, 2018-2019.

Könnunin leiddi í ljós að sveitarfélög sem ráku skóla fyrir um 38% grunnskólabarna landsins höfðu afnumið kostnaðarþátttöku þeirra í skólagögnum frá og með yfirstandandi skólaári. Fjölmörg sveitarfélög hafa nú bæst í hóp þeirra sem afnema kostnaðarþátttöku af þessu tagi og hafa komið þeim upplýsingum á framfæri við Velferðarvaktina eða á opinberum vettvangi.

Reykavíkurborg vegur þyngst af þeim sveitarfélögum en í Reykjavík eru um 14.000 börn á grunnskólaaldri. Alls búa því nú að minnsta kosti 40.859 börn, eða 94% grunnskólanemenda landsins, í sveitarfélögum þar sem búið er að taka ákvörðun um að afnema kostnaðarþátttöku vegna námsgagna á næsta skólaári.

Kostnaðarþátttakan fer hæst upp í 22.300 krónur

Þau 6% barna sem eftir standa búa í sveitarfélögum sem hafa ýmist dregið úr kostnaðarþátttökunni, svöruðu ekki könnuninni, sögðust ekki hafa stefnu í málinu eða gætu ekki svarað.

Samkvæmt upplýsingum frá Velferðarvaktinni er kostnaðarþátttaka mjög mismunandi og fer hæst upp í 22.300 krónur.

Hér er hægt að lesa skýrsluna í heild sinni.