BHM lýsir yfir þungum áhyggjum af stöðu kjaraviðræðna

Bandalag háskólamanna, BHM, lýsir yfir þungum áhyggjum af stöðu kjaraviðræðna sautján aðildarfélaga bandalagsins við ríkið. Þau telja nauðsynlegt að komið verði til móts við kröfur félaganna.

Í yfirlýsingu frá BHM í tilefni af fundi stjórnvalda með aðilum vinnumarkaðarins í dag kemur fram að lítið hafi miðað í viðræðum. „Samningar félaganna hafa verið lausir í fjóra mánuði eða allt frá því að gildistími gerðardóms frá árinu 2015 rann út í lok ágúst. Lítið hefur þó miðað í viðræðunum.“

Þá bendir bandalagið á að Félag íslenskra náttúrufræðinga hafi vísað kjaradeilu sinni við ríkið til ríkissáttasemjara.

Launasetning félagsmanna óeðlilega lág og í engu samræmi við menntun

BHM segir í yfirlýsingunni að mikilvægt sé að komið verði til móts við réttmætar og sanngjarnar kröfur félaganna um að menntun verði metin til launa. „Hækka þarf laun á mörgum ríkisstofnunum þar sem launasetning félagsmanna er óeðlilega lág og í engu samræmi við menntun þeirra, reynslu og ábyrgð. Einnig leggur BHM áherslu á að tryggt verði að launaþróun félagsmanna verði í samræmi við launaþróun viðmiðunarhópa.“

Í yfirlýsingunni segir að nauðsynlegt sé að bæta starfsumhverfi á mörgum stofnunum. Enn fremur bendir BHM á að á næstunni munu stórir hópar háskólamenntaðra sérfræðinga hjá ríkinu fara á eftirlaun. „Vandséð er að hægt verði að fylla í skörðin nema laun og starfsaðstæður á viðkomandi stofnunum verði bætt verulega.“

Að mati BHM vekur fjárlagafrumvarp ríkisstjórnarinnar fyrir árið 2018 ekki vonir um að gerðar verði nauðsynlegar úrbætur í þessu tilliti.

Fjölmennir hópar kvenna sem hafa lág laun miðað við menntun

BHM áréttar einnig í yfirlýsingunni að innan bandalagsins séu fjölmennir hópar kvenna sem hafa lág laun miðað við menntunarstig. Fagstéttir sem starfa í heilbrigðis- og menntageiranum eru sérstaklega nefndar.

„Verðmæti þeirrar menntunar sem þessar stéttir hafa aflað sér endurspeglast alls ekki í launasetningu þeirra. Brýnt er að endurmeta laun þessara sérfræðinga og taka tillit til þeirrar menntunar sem þeir hafa aflað sér,“ segir í tilkynningunni.