Viss um að tæknivæddir þjófar hafi stolið úr bíl í Hafnarfirði

„Ég tapaði verðmætum þarna,“ segir Björgúlfur Þorsteinsson, rafvirki og kennari við Tækniskólann, sem varð fyrir því í vikunni að óprúttnir aðilar brutust inn í Lexus-bifreið hans í Hafnarfirði og létu greipar sópa.

Björgúlfur telur ljóst að þarna hafi farið tæknivæddir þjófar sem hafi notað tækni þar sem merki frá lyklum bifreiða með lyklalausu aðgengi er notað til að opna þá. Hann telur fólk þurfa að gera ráðstafanir því að þjófar geti notað merki, þó veik séu, frá bíllyklum sem séu inni í húsum til að komast inn í bíla í dag, líkt og í hans tilfelli. Lögreglan telur ekki hægt að útiloka að þessi tækni sé komin til landsins.

„Eftir að hafa tilkynnt málið til lögreglu og bílaumboðsins fór ég að lesa mér til um þetta og sá að það er ekkert mál að fara inn í bíla með lyklalaust aðgengi og nokkuð algengt,“ segir Björgúlfur.

„Ég sá að fólki hefur verið ráðlagt að geyma lyklana hreinlega inni í ísskáp en ég fann betri lausn, sem er að setja þá í kökubox úr málmi.“

Björgúlfur segir mikilvægt að fólk viti af þessum möguleika og verji eigur sínar og bíla. Mackintosh-dósirnar fyrir jólin geti þannig öðlast nýtt hlutverk við að sporna gegn innbrotum, sem Björgúlfur kveðst hafa heyrt að mikið hafi verið um í Hafnarfirði að undanförnu.

Samhliða því að komast inn í læstan bílinn virðast þrjótarnir einnig hafa komist hjá öðrum öryggisbúnaði bílsins, öryggismyndavél sem Björgúlfur telur þjófana hafa ruglað meðan þeir athöfnuðu sig. Myndavélin hafi ekkert tekið upp meðan innbrotið átti sér stað en svo farið í gang þegar þegar hann kom að bílnum eftir á. Hann kveðst ekki í nokkrum vafa um að þetta sé þaulskipulögð starfsemi.

„Þetta eru skipulagðir glæpir.“

Nokkur umfjöllun hefur verið um þessa tegund innbrota í bíla í erlendum fjölmiðlum á borð við The New York Times og á tæknivefsíðunni Wired undanfarið. Þar er bent á að hægt sé að kaupa og smíða búnað til þessa tiltölulega ódýrt.

Margeir Sveinsson, aðstoðaryfirlögregluþjónn í Hafnarfirði, segir þessar aðferðir þekktar erlendis.

„Það er búið að vera nokkuð um að farið sé inn í bíla hér. Ummerkjalaust, já. En hvort sú tækni sé notuð eða önnur hefur ekki verið skoðað sérstaklega. Þetta er þekkt erlendis og aðrar aðferðir en við getum ekki útilokað neitt. Það sem kemur erlendis berst oftar en ekki hingað.“

Margeir bendir á að mál sem þessi geti verið snúin, meðal annars þar sem tryggingafélögin líti svo á að ummerki um innbrot þurfi að vera til staðar svo fólk fái tjón sitt bætt.