Ætla ekki í meiðyrðamál við bæjarstjóra Ísafjarðar

Stjórnsýsla Bæjarráð Ísafjarðarbæjar sé enga ástæðu til að biðjast afsökunar á ummælum bæjarstjórans, Gísla Halldórs Halldórssonar, sem nefndarmenn í starfshópi sjávarútvegs- og landbúnaðarráðherra um stefnumörkun í fiskeldi tóku óstinnt upp. Bæjarstjórinn hafði áður hafnað kröfu nefndarmannanna um opinbera afsök­unarbeiðni sem Gísli lét falla á fundi bæjarstjórnar. Til umræðu á fundinum voru tillögur starfshópsins um stefnumótun í fiskeldi en nefndarmenn litu svo á að í ummælum Gísla fælist gróf og ósönn ásökun um að fulltrúi veiðiréttarhafa og fulltrúar laxeldisfyrirtækjanna hefðu sýnt af sér óheilindi og óheiðarleika í störfum. Vísuðu þeir sérstaklega til fullyrðinga bæjarstjóra um að framan­greindir fulltrúar hafi „plottað“ og haft „hrossakaup“ sem leiddu til þeirrar niðurstöðu að ekki yrði leyft sjókvíaeldi í Ísafjarðardjúpi. Óðinn Sigþórsson, Guðmundur Gíslason og Kjartan Ólafsson fóru fram á afsökunarbeiðni frá Ísafjarðar­bæ og var málið tekið fyrir á fundi bæjarráðs á mánudag. Þar bókar bæjarráð að það vilji árétta að bæjarstjóri beri ábyrgð á eigin ummælum á bæjarstjórnarfundi, ekki bæjarstjórn Ísafjarðarbæjar. „Jafnframt vill bæjarráð vekja athygli á að það hefði ekki átt að þurfa að koma nefndarmönnum á óvart að tillaga þeirra um að loka Ísafjarðardjúpi fyrir laxeldi væri umdeild og myndi skapa miklar umræður. Nefndarmenn hljóta að hafa gert sér grein fyrir því.“ Í bréfi sínu útilokuðu Óðinn, Guðmundur og Kjartan ekki að höfða meiðyrðamál á hendur bæjar­stjóranum ef ekki yrði orðið við kröfu þeirra um afsökunarbeiðni. Óðinn segir í samtali við Fréttablaðið að hann telji þó að ekki muni koma til þess. „Okkar markmið var fyrst og fremst að hnekkja þessum ósanna áburði á opinberum vettvangi og ég held að það hafi tekist fullkomlega. Það tekur því ekki að vera að eltast við menn fyrir dómstólum.“ – smj