805 þúsund farþegar frá Keflavíkurflugvelli til Bandaríkjanna í fyrra

Í fyrra flugu 805 þúsund farþegar frá Keflavíkurflugvelli til Bandaríkjanna. Þetta kemur fram á vefnum turisti.is en vefurinn fékk gögn frá bandarískum samgönguyfirvöldum við vinnslu fréttarinnar.

Í dag fljúga 22 þotur héðan til Bandaríkjanna. Farþegum í Flugstöð Leifs Eiríkssonar stendur til boða mun tíðari ferðir til Bandaríkjanna og til fleiri áfangastaða en gerist og gengur á hinum Norðurlöndunum. Úrvalið kemur til með að aukast á næsta ári með nýjum áfangastöðum í miðvesturhluta Bandaríkjanna.

Lega Íslands og sú staðreynd að bæði Icelandair og WOW gera út á flug milli N-Ameríku og Evrópu er talin ein helsta ástæðan fyrir því að framboðið á Bandaríkjaflugi héðan er eins mikið það er.

Farþegum Icelandair fjölgar umtalsvert

Farþegum Icelandair fjölgar umtalsvert á milli ára þrátt fyrir að WOW air hafi byrjað að fljúga til Bandaríkjanna fyrir tveimur árum.

Innkoma Delta Air Lines hefur heldur ekki dregið úr umsvifum Icelandair.