Yfir 30 milljónir króna safnast til styrktar Nuugaatsiaq

Rúmlega þrjátíu milljónir króna hafa nú safnast í átakinu Vinátta í verki en söfnunin hefur nú staðið yfir í tólf daga. Safnað er til styrktar íbúum í grænlenska þorpinuu Nuugaatsiaq en flóðbylgja, orsökuð af berghruni, skall á bænum 18. júní síðastliðinn.

Fjórir týndu lífi í flóðbylgjunni og gríðarlegt eignatjón varð í Nuug­aats­iaq vegna hennar.

Forsætisráðherra Grænlands, Kim Nielsen, hefur lýst því yfir að þorpið verði mannlaust í ár hið minnsta vegna hamfaranna.

„Í gær söfnuðust 600 þúsund krónur á Flateyri en íbúar þar vildu þakka stuðninginn sem Grænlendingar sýndu í kjölfar snjóflóðanna árið 1995,“ segir Hrafn Jökulsson, upphafsmaður Vináttu í verki. Vika er síðan Hrafn hóf að safna.

„Næsta vika verður helguð því að fá öll 74 sveitarfélög landsins til að sýna vináttu í verki,“ segir hann.

Hrafn segir að það liggi ekki fyrir hvenær söfnuninni ljúki. Hún muni halda áfram út þessa viku og lengur, ef þörf krefur, til að ná 50 milljóna króna markinu sem sett var í upphafi. „Peningarnir eru samt auka­atriði. Vináttan er það sem mestu máli skiptir,“ segir Hrafn.

Hann segir einnig óvíst hvernig fénu verði komið til Grænlands enda óvissa um til hvaða aðgerða stjórnvöld ytra ætli að grípa.

„En það er alveg ljóst að hver króna sem safnast mun renna til fórnarlambanna. Það verður gert í samráði við fólkið sjálft og hjálparsamtök á svæðinu,“ segir Hrafn.

Reikningsnúmer Vináttu í verki

0334-26-056200, kennitala 450670-0499