Þrjár vikur síðan heyrðist í Rimantas

Ekkert hefur spurst til manns á fertugsaldri sem hefur verið saknað í um þrjár vikur. Tilkynnt var um hvarf mannsins í gær og hófu lögregla og björgunarsveitir þegar leit.

Maðurinn sem saknað er heitir Rimantas Rimkus og er 38 ára gamall. Hann er 187 sentimetrar á hæð, 74 kíló með dökkt stutt hár. Ekki er vita hvernig hann var klæddur.

Rimantas hefur haldið til í bíl sínum að undanförnu en bíllinn fannst yfirgefinn við Elliðaárdal. Málið var tilkynnt til lögreglu í gær en þá hafði ekkert spurst til Rimantas í um þrjár vikur.

„Það voru vinir hans sem komu hingað á lögreglustöðina rétt rúmleg fjögur í gær og lýstu yfir áhyggjum sínum um að þeir höfðu ekki heyrt í honum síðan um mánaðamót. Í kjölfarið er farið af stað með að hefja leit,“ segir Heimir Ríkarðsson, lögreglufulltrúi hjá Lögreglunni á höfuðborgarsvæðinu.

Lögregla óskaði eftir aðstoð björgunarsveita og hófu á annað hundrað manns leit í Elliðaárdal um kvöldmatarleitið í  gær en göngu- og hjólahópar fóru um svæðið og notast var meðal annars við leitarhunda og dróna við leitina. Þá var einnig leitað í árfarveginum í dalnum.

Annar bíll sem maðurinn hafði til umráða fannst svo í Hátúni í gærkvöldi og var einnig leitað á því svæði. Lögreglan á höfuðborgarsvæðinu vinnur að gagnaöflun í málinu en óvenjulegt er að maðurinn láti ekki heyra í sér.

„Ættingjar segja að það líði svona þrír dagar til vika á milli þess sem þeir heyra í honum en aldrei svona lengi,“ segir Heimir.

Björgunarsveitir leituðu á svæðinu fram á nótt en án árangurs og hefur dagurinn í dag farið í að reyna rekja ferðir mannsins, meðal annars í gegnum farsímasenda. 

Samkvæmt upplýsingum frá lögreglu er ekki talið að hvarfið hafi borið að með saknæmum hætti.

Þeir sem geta veitt upplýsingar um ferðir Rimantas eru beðnir um að hafa samband við lögreglu í síma 112, en upplýsingum má einnig koma á framfæri í einkaskilaboðum á Facebook síðu Lögreglunnar á höfuðborgarsvæðinu.