Mótmæla byssunum á Austurvelli klukkan 11

Jæja-hópurinn hefur boðað til mótmæla vegna vopnaburðar á fjöldasamkomum. Mótmælin, sem eru undir yfirskriftinni Fokk the Glock, verða á Austurvelli í dag og hefjast klukkan 11.

Á sérstakri Facebook-síðu sem heldur utan um mótmælin segir að hópurinn mótmæli harðlega vopnaburði íslensku lögreglunnar og sérsveitarmanna á almannafæri, á 17. júní 2017 sem og alltaf.

Sara Óskarsson, meðlimur í Jæja-hópnum, segir Ísland þekkt fyrir að vera friðsælt land.

„Okkur finnst stinga mikið í stúf við anda og yfirbragð lýðveldishátíðar þjóðarinnar að lögreglan sé allt í einu mætt með Glock 17 fyrir allra augum.“

Hátiðardagskrá fer fram á Austurvelli í dag og hefjast að lokinni messu í Dómkirkjunni, um klukkan 11:10.