Hóta málssókn eftir að Hafnarfjarðarbær afturkallaði lóðarúthlutun

Bæjarstjórn Hafnarfjarðar afturkallaði á miðvikudag úthlutun lóðarinnar Þorlákstúns þar sem fjárfestar vildu byggja garðyrkjustöð eða íbúðabyggð. Þeir vísa fullyrðingum um verulegar vanefndir á bug og segja bæinn hafa kallað yfir sig tjón upp á hundruð milljóna króna.

Bæjaryfirvöld sömdu um úthlutun á lóðinni Lyngbarði 2 (Þorláks­túni) á Holtinu í Hafnarfirði til einkahlutafélagsins Syðra-Langholts á vormánuðum 2006. Eigendur félagsins ætluðu þá að byggja gróðrarstöð samkvæmt gildandi skipulagi. Fluttu þeir árið 2011 gamalt niðurnítt hús úr bænum inn á lóðina sem er í rótgrónu íbúðarhverfi. Húsið var gert upp og í júní í fyrra óskuðu fjárfestarnir eftir viðræðum um aðra byggingu úr íslenskum skógarviði undir plöntusölu. Nokkrum mánuðum síðar höfðu áformin breyst og stefnt að 300 íbúðum og að fundin yrði ný staðsetning undir gróðrarstöðina.

„Það er ekki rétt að það hafi orðið vanefndir af okkar hálfu enda höfum við ítrekað óskað eftir því að fá að hefja framkvæmdir og þá upphaflega við gróðurstöð. Fyrir rúmu ári síðan komu hugmyndir frá bænum um að þarna yrði ráðist í umfangsmikla þéttingu íbúðabyggðar,“ segir Ómar R. Valdimarsson, stjórnarmaður í Syðra-Langholti en félagið er meðal annars í eigu Garðlistar og Upphafs fasteignafélags. 

„Okkar tillögu var svarað með skætingi og þá reyndum við að halda áfram með upphafleg plön. Lóðarleigusamningurinn er eign okkar og útilokað að við sættum okkur við að bærinn rífi hann af okkur. Ef bærinn býður ekki upp á ásættanleg málalok þá eru dómstólar sá valkostur sem einn stendur eftir og þetta á eftir að kalla yfir bæinn tjón upp á hundruð milljóna.“

Samkvæmt samkomulaginu var ekki greitt sérstaklega fyrir lóðina en ársleiga átti að vera 0,35 prósent af fasteignamati lóðarinnar. Í samantekt bæjarlögmanns segir að lítil eða engin hreyfing hafi verið á málum á tímabilinu nóvember 2008 til júlí 2015. Framkvæmdum hafi aftur á móti átt að vera lokið fyrir sumarið 2010. 

„Þetta var leigusamningur til 25 ára og það er vel liðið á það tímabil og með hliðsjón af því að ekkert hefur verið gert þarna var þetta niðurstaðan,“ segir Haraldur L. Haraldsson, bæjarstjóri Hafnarfjarðar.