Costco-hrellinum hent út úr Facebook-hópnum

Gísla Ásgeirssyni þýðandi hefur verið gerður útlægur úr Costco-hópnum eftir nýjasta uppátæki hans þar sem var að ruglast á kælikörfu og ferðaklósetti. Það var meira en hinn röggsami stjórnandi þessa eins stærsta Facebookhóps Íslands, Sólveig Bergland Fjólmundsdóttir, þoldi. Og útilokaði hann frá frekari þátttöku á þeim vettvangi.

„Ég var rekinn úr hópnum í gær. Fjörbaugsgarður, drengur minn. Ég held að stalíneðli stjórnanda hafi náð ákveðnu hámarki,“ segir Gísli Ásgeirsson við blaðamann en Vísir greindi frá uppátækjum hans á þessum vettvangi fyrir nokkru en hann hefur mátt búa við það að innleggjum hans hefur flestum verið eytt.

Gísli greinir nánar frá tildrögum þessar útilokunar á bloggsíðu sinni.

„Eftir fimmtu tilraun til að sýna ábyrgð og sinna upplýsingaskyldu minni er nú svo komið að stjórnendur hafa ákveðið að víkja mér úr hópnum og bannfæra mig að því marki að ég sé ekki lengur efni og innlegg hans. Þetta er miður því ég treysti á hópinn til að veita mér góðar upplýsingar og stuðla þannig að verðvitund minni og heilbrigðum viðskiptaháttum. Mér líður eins og Gunnari á Hlíðarenda sem var gert að víkja úr landi en honum þótti fögur hlíðin, eins og mér þykir framhliðin á Koskó, og helst hefði ég viljað fara hvergi. En þessu ræður lögréttan á Sauðárkróki,“ skrifar Gísli og vísar þar til búsetu Sólveigar Bergland Fjólmundsdóttur – en húmor hennar gagnvart hafnfirska þýðandanum er á þrotum; hafi hann einhvern tíma verið til staðar.