Fimm ríkisstofnanir rafbílavæðast fyrir 25 milljónir króna

Fimm ríkisstofnanir fá á næstu vikum afhenta sjö vel útbúna Nissan Leaf-rafbíla frá BL að undangengnu útboði hjá Ríkiskaupum. Kaupverð bifreiðanna sjö er rúmar 25 milljónir króna en forsvarsmenn Ríkiskaupa segja vaxandi áhuga hjá stjórnendum og rekstraraðilum ríkisstofnana að auka vægi vistvænna bifreiða í þjónustu þeirra.

Halldór Sigurðsson, forstjóri Ríkiskaupa, segir að Háskóli Íslands muni kaupa þrjá bíla en ÁTVR, Landbúnaðarháskóli Íslands, Náttúrufræðistofnun og Tollstjóri einn hver.

Aðspurður um kaupverðið segir Halldór að tilboð BL hafi hljóðað upp á 3.590.000 krónur fyrir hvern bílanna sjö en hverjum þeirra fylgja vetrar- og sumardekk, heimahleðslustöð og þriðji lykill. Ljóst er að Ríkiskaup hafa náð hagstæðum innkaupum á rafbílunum.

„Bifreiðarnar eru mjög vel búnar. 360 gráðu myndavél, sólarsella í vindskeið, led-aðalljós, svartar felgur, svartir speglar og svartar rúður.“

Ný tegund Nissan Leaf-rafbíla, með nýtt útlit, stærri rafhlöðu og aukið drægi er væntanleg á markað á næsta ári en Halldór segir að bílarnir sem keyptir voru séu eldri gerðin með 30 kWh rafhlöðu. Ríkis­kaup segja kaup á vistvænni bifreiðum vera að aukast jafnt og þétt hjá ríkisstofnunum en í dag eru um 4,5 prósent bifreiðaflota ríkisins vistvænni bifreiðar á borð við rafmagns- og hybrid-bifreiðar.

Jón Gunnar Ottósson, forstjóri Náttúrufræðistofnunar, segir rafbílinn koma til með að leysa af Hyundai-smábíl sem starfsmenn stofnunarinnar nota innanbæjar og í styttri ferðir á höfuðborgarsvæðinu. Bifreiðin hafi sparað dýrar ferðir til Reykjavíkur eftir að stofnunin flutti í Urriðaholt í Garðabæ. Jón Gunnar segir flestar aðrar stofnanir nota leigubíla í sambærilegar ferðir, sem væri dýrari kostur fyrir Náttúrufræðistofnun. Bifreiðin hafi verið komin á tíma og því ákveðið að endurnýja.

„Rafmagnsbíll ætti að auka enn á þennan sparnað í rekstri,“ segir Jón Gunnar en segir enga ákvörðun hafa verið tekna um endurnýjun á jeppum stofnunarinnar sem báðir séu komnir á tíma.

„Við viljum rafvæða ef það er mögulegt.“