Fá að selja bjór til 4:20 á Granda vegna bardaga

Borgarráð Reykjavíkur samþykkti í síðustu viku að veita brugghúsinu Ægisgarði tímabundið leyfi til lengri veitingatíma áfengis vegna beinnar sjónvarpsútsendingar frá bardaga hnefaleikakappans Floyd Mayweather og UFC kappans Conor McGregor í Bandaríkjunum þann 26. ágúst. 

Þetta gerir brugghúsinu kleift að hafa opið til klukkan 04.20 aðfaranótt mánudagsins 27. ágúst. Fréttastofa RÚV greindi fyrst frá.

Þetta er ekki í fyrsta skipti sem skemmtistaðir eða brugghús sækjast eftir rýmri opnunartíma vegna íþróttaviðburða. Öldurhús hér á landi hafa til að mynda sóst eftir því að fá rýmri opnunartíma þegar úrslitaleikurinn í NFL deildinni, Ofurskálin, fer fram árlega. Hefur það reynst þrautinni þyngri en nokkrir staðir fengu þó leyfi í febrúar síðastliðnum.

Í umsögn um veitta undanþágu segir að það skipti máli að brugghúsið sé staðsett á hafnarsvæðinu því engar íbúðir eru í námunda við staðinn. Annað er uppi á teningnum í miðbæ Reykjavíkur þar sem íbúðir eru í næsta nágrenni.