Tjón á fjölda bíla eftir mistök á Kirkjusandi

„Ég er náttúrulega mjög ósáttur við þetta,“ segir Jóhann Vilhjálmsson, byssusmiður og íbúi á Laugarnesvegi, einn þeirra mörgu íbúa í nágrenni við framkvæmdasvæðið á Kirkjusandi sem uppgötvuðu tjón á bifreiðum sínum um miðja síðustu viku. Mistök urðu til þess að málningaragnir bárust frá framkvæmdasvæðinu yfir nærliggjandi byggð með þeim afleiðingum að bílrúður og lakk bifreiða sat eftir hrjúft og hraunað. Verktakinn sem sér um niðurrif bygginga á Kirkjusandsreitnum segir undirverktaka bera ábyrgð á mistökunum. Málið sé tryggingamál og verði bætt.

Umræða hófst um málið í Face­book-hópi íbúa í Laugarneshverfi í síðustu viku þar sem íbúar tóku eftir því að ekki væri allt með felldu. Jóhann er einn þeirra og segir í samtali við Fréttablaðið að það sé eins og rúður og lakk bifreiða hafi verið sandblásið. Fólksbifreið og húsbíll hans hafi orðið fyrir þessu tjóni.

„Bíllinn er alveg hraunaður frá toppi til táar. Bíllinn er bara ónýtur og þetta er glænýr bíll,“ segir kona sem hafði samband við Fréttablaðið vegna málsins en baðst undan því að koma fram undir nafni. Hún hafði átt erindi á Laugarnesveginn í síðustu viku vegna vinnu og lagt bíl sínum þar í tæpa tvo tíma með þessum afleiðingum. Hún hvetur íbúa í nágrenninu til að athuga bíla sína en einnig hús og gluggarúður.

Undir það tekur Jóhann sem telur að tjónið kunni að vera talsvert.

„Ég fékk þau svör að verið væri að vinna í málinu en það er fínt að fólk viti af þessu. Það eru örugglega ekkert allir sem vita af þessu ennþá.“

Þor­steinn Auðunn Pét­urs­son, framkvæmdastjóri Work North sem sér um niðurrif á svæðinu, segir að undirverktaki hafi verið fenginn til að mála stálbita sem var í skemmu þegar eitthvað fór úrskeiðis. Í stað þess að pensla bitana hafi þeir verið sprautaðir.

„Work North ber enga ábyrgð á þessu, það var undirverktaki sem gerði þarna mistök.“

Hann kveðst ekki hafa upplýsingar um umfang tjónsins en einhverjir hafi sett sig í samband við hann vegna málsins. Hann ítrekar að málið sé tryggingamál. Öll fyrirtæki séu með frjálsa ábyrgðartryggingu gagnvart þriðja aðila og ef tjónið sé sök undirverktakans þá greiði tryggingafélag viðkomandi það.