Hlaupið svo gott sem búið

Jökulhlaupið í Múlakvísl er svo til búið að sögn sérfræðings hjá Veðurstofu Íslands. Rafleiðni í ánni er að nálgast eðlilegt horf og rólegt hefur verið í Mýrdalsjökli en færri en tíu jarðskjálftar hafa mælst undir Kötluöskjunni frá því í gærkvöldi.

Viðbúnaðarstig vegna hugsanlegs eldgoss var hækkað í gult vegna jökulhlaupsins og er það enn í gildi. Veðurstofan og almannavarnir endurmeta stöðuna á morgun um hvort viðbúnaðarstig verði lækkað aftur en þekkt er að jökulhlaup sem gengið hafa niður geti tekið sig um aftur.

Þá hefur jarðskjálftavirkni undir Fagradalsfjalli á Reykjanesi minnkað mikið en nokkrir stórir jarðskjálftar urðu þar í síðustu viku.

Tólf jarðskjálftar voru á svæðinu í nótt en enginn þeirra sem talist geti til tíðinda.

Uppfært klukkan 11.30

Hlaupið er yfirstaðið. Þetta kemur fram í tilkynningu frá Veðurstofunni.

„Jökulhlaupið í Múlakvísl á Mýrdalssandi er yfirstaðið. Rafleiðni nálgast smá saman eðlileg mörk en fólk er hvatt til þess að sýna aðgát við upptök árinnar vegna mögulegs gasútstreymis," segir í tilkynningu frá Veðurstofunni.