Lögbann á Deildu.net og Pirate Bay staðfest

Héraðsdómur Reykjavíkur staðfesti í dag lögbann á fjarskiptafélögin Símafélagið og Hringiðuna frá því í október 2014 við því að veita netaðgengi að vefsvæðunum Deildu.net og Pirate Bay. Lögbannið tekur einnig til léna sem vísa á sömu svæði. Þetta kemur fram í fréttatilkynningu frá STEF, Sambandi tónskálda og eigenda flutningsréttar.

STEF hefur haft forgöngu að lögbannsaðgerðunum með stuðningi Sambands íslenskra kvikmyndaframleiðenda, Sambands flytjenda og hljómplötuframleiðenda og Félags rétthafa í sjónvarps- og kvikmyndaiðnaði.

Héraðsdómur Reykjavíkur fyrirskipaði sambærilegt lögbann á stærstu netþjónustufyrirtæki landsins í október 2014. Símafélagið og Hringiðan fylgdu hins vegar ekki því fordæmi.

Opnaði vefsíðu á öðru léni eftir fyrri úrskurðinn

Í tilkynningu frá STEF kemur fram að lokun aðgengis á vefsíður sem hafa það að markmiði að miðla efni án heimilda rétthafa, líkt og Deildu.net og Pirate Bay, hafi gefið góða raun bæði hér og víða í Evrópu.

Þar segir jafnframt að aðgerðir sem þessar byggi á skýrum heimildum í íslenskum lögum ásamt tilskipun Evrópusambandsins. Lögbannið skerði ekki stjórnarskrárvarinn rétt einstaklinga til tjáningarfrelsis  en markmið aðgerðanna er að vernda eignarrétt og fjárhagslega afkomu höfunda, flytjenda og framleiðenda.

Hins vegar hefur verið bent á það að þrátt fyrir að ákveðin vefsvæði sæti lögbanni er hætt við að þau flytji þjónustu sína yfir á annað lén. Í frétt Nútímans sem birtist í kjölfar fyrra lögbannsins 2014 kom fram að Deildu.net hefði opnað vefsíðu sína á öðru léni, Iceland.pm, sama dag og dómurinn var kveðinn upp.

Flest af efninu er fáanlegt með löglegum hætti

Samkvæmt upplýsingum frá STEF er hægt að nálgast 90% af því efni sem Íslendingar hala niður af ólöglegum vefsvæðum með löglegum hætti við vefþjónustur sem eru með samninga við íslenska rétthafa.

Ólögmæt starfsemi af þessu tagi hefur í för með sér gífurlegt fjárhagslegt tjón rétthafa en nýleg könnun sem Capacent gerði sýnir að innlendir aðilar tapa 1,1, milljarði á ári vegna sjónvarps- og kvikmyndaefnis eingöngu. „Við óbreytt ástand og lagaumhverfi eiga rétthafar ekki annarra kosta völ en að verja lögmæta hagsmuni sína með lögbannsaðgerðum,“ segir að lokum í tilkynningu STEF.