Hætt með Loga og sinnir nú sólóferli

„Við vorum að gefa út fjögurra laga EP plötu, allt lög sem ég gerði með Loga Pedro, og við höfum verið að spila á tónleikum. Okkur fannst við verða að gefa þetta út svo við létum af því verða. En nú erum við hætt að vinna saman,“ segir tónlistarkonan Karin Sveinsdóttir, eða Young Karin, sem er að vakna upp eftir dálítinn dvala. Eftir ansi farsælt samstarf við Loga, sem er allt í öllu í íslensku tónlistarlífi um þessar mundir, hyggst Karin róa á ný mið.

„Við fórum strax að vinna saman eftir að ég tók þátt í söngkeppni Menntaskólans við Hamrahlíð, 2013. Við tókum alveg eitt og hálft ár í að vinna saman í tónlistinni. Logi hefur hjálpað mér mjög mikið, og bróðir minn líka heilmikið,“ segir Karin, en rapparinn Emmsjé Gauti er einmitt stóri bróðir hennar. Spurð um hvort hún sjái fyrir sér að vinna með honum, segir hún létt í bragði það auðvitað hafa komið til tals, þó ekkert hafi raunverulega gerst í þeim efnum enn sem komið er.

Karin er nýorðin tvítug en hefur verið viðloðandi bransann undanfarin þrjú ár eins og áður segir. Hún segir mikið hafa breyst á ekki lengri tíma og er vel í stakk búin fyrir komandi sólóferil.

„Ég er búin að læra mikið, ég fór inn í þetta allt saman vitandi ekkert um þennan heim og hef fengið góðan tíma til að finna út hvað ég vil og hvernig tónlist ég vil vinna. Mig langaði til að fara að semja meira sjálf, ég hef ekki gert það með Loga. Mér finnst gaman að syngja, auðvitað, en nú kemur meira frá mér,“ útskýrir Karin.

Hún segir fyrsta kast væntanlegt í lok sumars, en það hefur hún undirbúið með þeim Helga Sæmundi, úr Úlfi Úlfi, og Birni Vali Pálssyni, en þeir skipa saman hljómsveitina Sxsxsx. „Þetta er í raun allt önnur tónlist en við Logi höfum verið að vinna. Svipaður stíll kannski en samt allt öðruvísi. Samvinnan hefur gengið mega vel og við sjáum fyrir okkur að gera saman nokkur lög,“ segir hún, auðheyrilega spennt og undirstrikar að hún ætli ekki að festa sig neitt, heldur njóta þess að vinna með hinum ýmsu tónlistarmönnum á næstunni.

„Annars er þetta allt saman eitt stórt spurningarmerki hjá mér, ég veit ekki hvað kemur í kjölfarið. En ég er ofboðslega spennt fyrir komandi tímum,“ segir hún hógvær að lokum. 

Greinin birtist fyrst í Fréttablaðinu.