Segist vera hjólabrettakappinn í hinu umdeilda Rhode Island myndbandi

Íslenski hjólabrettakappinn Róbert Vilhjálmsson segist vera hjólabrettakappinn sem bregði fyrir við Hörpu í fyrstu útgáfu hins umdeilda kynningarmyndbands Rhode Island ríkis í Bandaríkjunum. Framleiðslufyrirtækið segir að umræddur hjólabrettakappi hafi verið frá Rhode Island.

„Myndbandið sem um ræðir er af hjólabrettakappa frá Rhode Island og tekið upp af kvikmyndatökumanni frá Rhode Island,“ segir í opinberri afsökunarbeiðni framleiðslufyrirtækisins IndieWhip sem birt var á vefsíðu fyrirtækisins.

Sjá einnig: Reykjavík óvart gestur í hundruð milljóna herferð Rhode Island

Róbert Vilhjálmsson, íslenskur hjólabrettakappi, segir hinsvegar að það sé alrangt, hann sé sá sem sést á myndbandinu fræga. Hann og félagar hans hafi verið á hjólabrettunum sínum við Hörpu að æfa sig fyrir um þremur vikum þegar maður kom að þeim og spurði hvort hann mæti taka myndir af þeim.

„Hann var með flotta og dýra myndavél og lagði mikinn metnað í þetta,“ segir Róbert í samtali við Vísi. „Við héldum að þetta væri ferðamaður og vorum ekki mikið að pæla í þessu, það er oft sem einhver tekur myndir af okkur þegar við erum að æfa okkur.“

Sjá einnig: Allt vitlaust í Rhode Island vegna Hörpu

Róbert hefur húmor fyrir mistökunum hjá framleiðslufyrirtækjunum við myndbandið sem þykja nokkuð pínleg. Herferðin, sem myndbandið er hluti af, kostaði hundruð milljónir króna. og hefur yfirmaður herferðarinnar af hálfu Rhode Island sagt af sér vegna málsins. Róbert er þó ekki sáttur við að vera bendlaður við Rhode Island.

„Félagi minn sá þetta myndband og þekkti mig strax. Mér finnst þetta aðallega bara frekar fyndið allt saman en ég er samt stoltur Íslendingur og vil ekki að það sé verið að tengja mig við Rhode Island,“ segir Róbert.

Sjá einnig: Rhode Iceland? Fyrirtækið sem framleiddi hið umdeilda Hörpu-myndband gerir óspart grín að því

Róbert segist hafa haft samband við IndieWhip og óskað eftir því að því sé komið á framfæri að það sé Íslendingur en ekki einhver frá Rhode Island sem sést í myndbandinu. Hann hefur þó engin svör fengið enn sem komið er.

Svo virðist reyndar að IndieWhip taki málinu ekkert sérstaklega alvara, gerðu þeir stólpagrín að mistökunum í apríl-gabbi í myndbandi sem birt var í gær. Þeir útbjuggu þó nýtt Hörpufrítt myndband, Rhode Island ríki að kostnaðarlausu í sárabætur fyrir upphaflegu mistökin.

Myndbandið umdeilda má sjá hér fyrir neðan.