Lúpínan farin að sækja á hálendið

Sveinn Runólfsson landgræðslustjóri telur að lúpínan sé að breiða meira úr sér eftir því sem árin líða. „Já, ég held það. Þetta magnast ár frá ári,“ segir Sveinn. Jurtin finnist sífellt á nýjum stöðum og þá breiði hún úr sér þar. „Ég sé ekkert breyta þeirri þróun í sjálfu sér.“

Sveinn segir lykilatriði að stöðva útbreiðsluna á hálendinu. „Það er hægara um vik og þar á hún alls ekki heima,“ segir Sveinn. Á öðrum stöðum sé hægt að planta í hana og nýta hana þannig.

Sveinn segir ekki ráðlegt að drepa lúpínuna með því að eitra fyrir henni, betra sé að slá hana og reyta á réttum tíma. „Við erum með afar athyglisverðar prófanir á eyðingu hennar í samstarfi við Stykkishólmsbæ. Það eru nú ekki komnar neinar niðurstöður úr því en þó er nú heldur hagstæðara að sleppa eitrinu og slá og reyta á hárréttum tíma,“ segir Sveinn. Þetta þýðir að það þurfi að slá og reyta hana áður en hún fer að fella fræ. Lúpínan fellir fræ í lok júlí.

Sveinn segir að það hafi verið auðveldara fyrir lúpínuna að breiða úr sér í sumar, vegna þess að hún byrjar að vaxa á undan öðrum gróðri á vorin. „Þannig að hún fékk gott forskot í ár. Þegar annar gróður var lítt kominn af stað þá hélt hún sínu striki,“ segir Sveinn og bendir á að lúpínan sé mjög harðger planta. Þá bendir Sveinn á að skógarkerfillinn sé víða að sækja inn í lúpínuna. Skógarkerfillinn er algjörlega gagnslaus og mjög hvimleiður, að mati Sveins.

„Hann skapar engan ríkan jarðveg eins og lúpínan gerir,“ segir hann. Sveinn segist ekki hafa hugmynd um hvaðan skógarkerfillinn komi, en grunur leiki á að fólk dreifi lúpínunni. „Við teljum að því miður séu einhverjir enn þá að dreifa lúpínu með fræi eða plöntum. En ég trúi því ekki að nokkur einasti maður dreifi skógarkerfli vegna þess að hann er skaðræði,“ segir Sveinn.