Vinnuhópur skoðar stöðu Grímseyjar

Settur verður á laggirnar vinnuhópur, þvert á ráðuneyti, sem skoða á stöðu Grímseyjar í samvinnu við aðgerðahóp á vegum Akureyrarbæjar. Þetta var samþykkt á ríkisstjórnarfundi í dag, að tillögu forsætisráðherra og sjávarútvegs- og landbúnaðarráðherra.

„Það er brýnt að bregðast við þeirri erfiðu stöðu sem uppi hefur verði í Grímsey síðustu ár. Heimamenn óttast að ef ekkert verður að gert þá leggist útgerð í Grímsey af og jafnvel búseta í framhaldi þess. Ég trúi því ekki að nokkur vilji láta það gerast,“ sagði Sigmundur Davíð Gunnlaugsson, forsætisráðherra, í tilkynningu frá Forsætisráðuneytinu.

Samkvæmt tilkynningunni verður vinnuhópur ríkisstjórnarinnar skipaður fulltrúum frá eftirtöldum aðilum: Frá sjávarútvegs- og landbúnaðarráðherra vegna tengingar við byggðamál og sjávarútveg, frá innanríkisráðherra vegna samgöngumála, frá iðnaðar- og viðskiptaráðherra vegna raforku- og hitaveitumála og frá forsætisráðuneyti sem mun leiða hópinn.

Vinnuhópurinn mun starfa með aðgerðarhóp sem Akureyrarbær setti upp í apríl. Honum var falið að fara yfir stöðu byggðarlagsins auk þeirra útgerðarfyrirtækja sem eru í brýnustum vanda auk annarra þátta sem gætu auðveldað búsetu í Grímsey.

Vinnuhópurinn skal ljúka störfum fyrir 1. nóvember á þessu ári.