Frakkinn ungi einfari sem nánast lokaði sig af í heimi tölvuleikja

Krufning á líki Florians Maurice Franco Cendre, fransks ríkisborgara sem fannst látinn í Laxárdal í Nesjum í ágúst síðastliðnum, leiddi ekki í ljós hvers vegna hann lést.

Samkvæmt upplýsingum frá lögreglunni á Suðurlandi er þó talið líklegast að hann hafi orðið úti skömmu eftir að hann kom til Hafnar í Hornafirði þann 2. október 2014. Þá bendir ekkert til þess að lát hans hafi borið að með saknæmum hætti.

Vitni sá bakpoka í dalnum sem ekki hefur fundist

Greint hefur verið frá því að vitni hafi séð mann ganga inn dalinn sama dag og Florian kom til Hafnar og passaði lýsing vitnisins við hann. Sagði vitnið að maðurinn hefði verið með bakpoka en um rúmum mánuði síðar átti vitnið leið um dalinn og sá þá bakpokann um 20 metra ofan við vegslóðann rétt innan við Þverá.

Taldi vitnið að einhver hefði lagt bakpokann frá sér og farið í göngu og setti hann því ekki í samhengi við manninn sem hann sá ganga inn dalinn mánuði fyrr. Við rannsókn lögreglu fannst bakpokinn ekki og er því ekki víst að hann hafi verið í eigu Florians. Líklegt má telja að Þverá hafi hrifsað pokann til sín þar sem farvegur hann hefur breyst mikið á þessum slóðum.

Lét fjölskylduna ekki vita af Íslandsferðinni

„Við vitum í raun ekkert af hverju hann var hér og munum ekki komast að því nema nýjar vísbendingar komi fram,“ segir Þorgrímur Óli Sigurðsson hjá lögreglunni á Suðurlandi.

Hann segir að Florian hafi til að mynda ekki látið fjölskylduna sína vita af því að hann væri á leið hingað til lands. Hann hafi verið mikill einfari og nánast lokað sig af í heimi tölvuleikja.