Lausafé Íslandspósts á þrotum

Handbært fé Íslandspósts hefur lækkað um tvo milljaraða króna frá árinu 2004. Þetta kemur fram í forsíðufrétt Viðskiptablaðsins frá í dag. Lausafé er nær uppurið og ekki verður hægt að greiða út laun eða standa við skuldbindingar nema aukið lánsfé komi til.

„Tapreksturinn er fjármagnaður með lánsfé, það er bara þannig,“ segir Helga Sigríður Böðvarsdóttir framkvæmdastjóri fjármálasviðs í samtali við blaðið. Nýir kjarasamningar, sem enn á eftir að samþykkja í Póstmannafélaginu, hafi mikil áhrif. „Það bara fer að styttast í annan endan.“

Eiríkur Haukur Hauksson, formaður stjórnar Íslandspósts, segir að allt muni vera gert til að tryggja að starfsfólk fyrirtækisins fái laun sín greidd. Haldi bréfamagn hins vegar áfram að minnka og ekkert yrði að gert gæti sú staða komið upp að ekki takist að greiða laun. „En það kemur ekki til þess,“ segir Eiríkur.