Segir Samfylkinguna hafa klikkað á stóru málunum þegar flokkurinn var í ríkisstjórn

Niðurstöður skoðanakönnunar MMR á fylgi stjórnmálaflokka sem birtar voru í vikunni hafa vakið mikla athygli, ekki síst vegna þess að Samfylkingin hefur aldrei mælst með minna fylgi.

Jón Baldvin Hannibalsson, fyrrverandi utanríkisráðherra og formaður Alþýðuflokksins, líkir ástandinu í stjórnmálum hér við ástandið á Spáni þar sem tveir nýir flokkar hafa sprottið upp, Podemos og Ciudadanos. Báðir flokkarnir náðu góðum árangri í héraðskosningum sem fram fóru á Spáni í vor.

„Það sem gerðist var það að pólitík á Spáni, eins og á Íslandi er algjörlega út úr kú. Hún er "rotten to the core." Almenningur er búinn að þola þetta, umbera þetta, en núna er komið að því að hann þolir þetta ekki lengur. Fastir liðir eins og venjulega duga ekki lengur,“ sagði Jón Baldvin í Reykjavík síðdegis í dag.

Hann sagði að ekki verið að ræða alvöru pólitík.

„Ef að Samfylkingin er "down and" out núna þá er það vegna þess að hún olli að nokkru leyti vonbrigðum í seinustu ríkisstjórn. Það er auðvitað eðlilegt að hún yrði óvinsæl út af hreinsunaraðgerðum þar en hún klikkaði á stóru málunum sem voru að koma á auðlindagjaldi fyrir einkaleyfisúthlutun ríkisins á auðlindum, breyta stjórnarskipun landsins í lýðræðisátt og leysa húsnæðisvanda ungs fólks.“

Jón Baldvin segir Samfylkinguna gelda fyrir þetta en flokkurinn sé þó ekki að bjóða upp á neinar róttækar lausnir. Hann segir fólk flykkjast að Pírötum án þess að vita mikið um þá:

„Þetta er mótmælaatkvæði því Íslendingar, eins og fólk reyndar víðar í Evrópu, er að gefast upp á venjulegum pólitíkusum sem hafa ekkert að segja.“

Hlusta má á viðtalið við Jón Baldvin í heild sinni í spilaranum hér að neðan.