Tvö hús flutt frá Grettisgötu - myndband

Flutningar á tveimur húsum við Grettisgötu hófust á fimmta tímanum í dag. Húsin voru flutt af skipulagsástæðum og farið verður með þau að Hólmaslóð á Granda þar sem þau verða geymd næstu misseri, eða þar til grunnur á framtíðarstað þeirra að Grettisgötu 9a og b verður gerður. Um er að ræða hús við Grettisgötu 17 og bakhús að Laugavegi 36.

Húsin eru nú, á sjötta tímanum, á horni Grettisgötu og Barónsstígs á meðan beðið er eftir heimild lögreglu til að halda flutningunum áfram. Talið er að það verði um klukkan 19 – 19.30 og áætlað er að flutningunum ljúki um klukkan 22 í kvöld. Á meðan verður hluta Grettisgötu, Barónsstígs, Frakkastígs, Klapparstígs og Bergþórugötu lokað og bílastæði takmörkuð.

Húsin vöktu töluverða athygli á síðasta ári eftir að íbúar við Grettisgötu mótmæltu nýju deiliskipulagi lóðarinnar en á henni stendur 107 ára gamall silfurreynir sem íbúarnir vildu standa vörð um.

Friðuðu húsin sem flytja á eru bæði úr timbri. Bakhúsið Laugavegur 36b er byggt 1896 og er því 118 ára gamalt. Grettisgata 17 er byggð 1902 og er þannig 112 ára. Minjastofnun segist ekki leggjast gegn flutningi húsanna að því gefnu að þeim verði fundinn framtíðarstaður í nágrenninu.

Myndband af flutningunum má sjá hér fyrir neðan.