Bændur taki þátt í skógrækt

Þórarinn Ingi Pétursson, formaður Landssamtaka sauðfjárbænda, vill að bændur og skógræktarfólk starfi saman og kanni grundvöll þess að hefja sérstakt átak í ræktun íslenskra beitarskóga. Þetta kom fram í erindi sem Þórarinn flutti á 80. aðalfundi Skógræktarfélags Íslands í Hofi á Akureyri.

Að verkefninu myndu starfa saman Landssamtök sauðfjárbænda, Skógræktarfélag Íslands, Skógrækt ríkisins, Landgræðsla ríkisins, Bændasamtök Íslands, Landssamtök skógareigenda og Umhverfis- og auðlindaráðuneytið.

Í tilkynningu frá Landssamtökum sauðfjárbænda segir að með vel heppnuðu samstarfi megi á næstu árum og áratugum setja stóraukinn kraft í skógrækt í landinu, bæta beitarland, fjölga trjám og stækka íslenska skóga.

Langstærstur hluti íslenskra birkiskóga sé á löndum bænda og er víðast í framför. Sauðfjárbændur hafa undanfarna áratugi gert árangursríkar tilraunir með skógarbeit þar sem skynsamleg og nútímaleg beitarstjórnun hefur skilað góðum árangri. Hagsmunir sauðfjárbeitar og skógræktar fara þar augljóslega saman.