Skipverjar úrvinda eftir barning

Fimm var bjargað á erlendri skútu sem lenti í hrakningum í hafi suður af Grindavík á miðvikudagskvöld. Skútan var vélarvana og með ónýtt segl.

Oddur V. Gíslason, björgunarskip Slysavarnafélagsins Landsbjargar í Grindavík, kom taug í skútuna á ellefta tímanum og kom með hana til hafnar í Grindavík klukkan hálf eitt aðfaranótt fimmtudags.

Samkvæmt upplýsingum frá Landsbjörg voru skipverjarnir fimm orðnir úrvinda og slæptir eftir að hafa barist við bilanir í skútunni í nokkra sólarhringa.